“கமேனி கதையை முடிச்சாச்சு… இனி யார் வந்தாலும் காலி செய்வோம்”… இஸ்ரேலின் அதிரடி மிரட்டல்… ஈரானின் அடுத்த வாரிசுக்கு காத்திருக்கும் ஆபத்து…..!

ஈரான் மற்றும் இஸ்ரேல் இடையேயான போர் பதற்றம் உச்சகட்டத்தை எட்டியுள்ள நிலையில், ஈரானின் அடுத்த உச்ச தலைவராகப் பொறுப்பேற்பவர் யாராக இருந்தாலும் அவர்கள் கொல்லப்படுவார்கள் என இஸ்ரேல் பகிரங்கமாக எச்சரிக்கை விடுத்துள்ளது. ஈரானின் முன்னாள் உச்ச தலைவர் அயதுல்லா அலி கமேனி, இஸ்ரேல் மற்றும் அமெரிக்கா நடத்திய கூட்டுத் தாக்குதலில் பிப்ரவரி 28 அன்று கொல்லப்பட்டதாக அதிகாரப்பூர்வமாக அறிவிக்கப்பட்ட நிலையில், இந்தப் புதிய மிரட்டல் சர்வதேச அரங்கில் பெரும் அதிர்வலைகளை ஏற்படுத்தியுள்ளது.

கமேனியின் மறைவைத் தொடர்ந்து, அவரது மகன் மோஜ்டபா காமேனி அடுத்த உச்ச தலைவராகத் தேர்ந்தெடுக்கப்பட வாய்ப்புள்ளதாகத் தகவல்கள் வெளியாகியுள்ளன. இதுகுறித்து தனது எக்ஸ் (X) தளத்தில் பதிவிட்டுள்ள இஸ்ரேல் பாதுகாப்பு அமைச்சர் இஸ்ரேல் கட்ஸ், புதிய தலைவராக யார் வந்தாலும், அவர் எங்கு பதுங்கியிருந்தாலும் தேடிச் சென்று அழிப்போம் என்று கூறியுள்ளார். மேலும், தற்போதைய ஈரானிய ஆட்சியை மாற்றியமைப்பதே தங்களின் இலக்கு என்றும், இதற்காக அமெரிக்காவுடன் இணைந்து முழு பலத்துடன் செயல்படுவோம் என்றும் அவர் உறுதிபடத் தெரிவித்துள்ளார்.

மறுபுறம், இஸ்ரேலின் இந்த அச்சுறுத்தல்களுக்கு ஈரான் பணியப்போவதில்லை என்று அந்நாட்டுத் தலைவர்கள் தெரிவித்துள்ளனர். லெபனான் மற்றும் ஈரானின் பல்வேறு பகுதிகளில் இஸ்ரேல் நடத்தி வரும் தாக்குதல்களுக்கு அஞ்சி பேச்சுவார்த்தைக்குச் செல்லப் போவதில்லை என்றும், அமெரிக்கா மீதான நம்பிக்கை தங்களுக்கு அற்றுப் போய்விட்டதாகவும் அவர்கள் கூறியுள்ளனர். சமரசத்திற்கு இடமில்லாமல், தங்கள் விருப்பப்படியே இந்தப் போர் தொடரும் என ஈரான் தரப்பு திட்டவட்டமாக அறிவித்துள்ளது.

இரு நாடுகளுக்கும் இடையே நிலவும் இந்த நேரடி மோதல் மத்திய கிழக்கு பகுதியில் அமைதியின்மையை மேலும் அதிகரித்துள்ளது. கமேனியின் இறுதிச் சடங்குகள் மார்ச் 4 அன்று நடைபெறவுள்ள நிலையில், புதிய தலைவரைத் தேர்ந்தெடுக்கும் பணிகளில் ஈரான் தீவிரமாக ஈடுபட்டுள்ளது. அதே வேளையில், இஸ்ரேல் தனது படைத்துறையைத் தயார் நிலையில் வைத்திருக்குமாறு அறிவுறுத்தியுள்ளது, வரும் நாட்களில் போர்ச் சூழல் மேலும் தீவிரமடையும் என்பதையே காட்டுகிறது.