வயிறு உப்புசம் என்பது இன்றைய காலகட்டத்தில் பலரும் எதிர்கொள்ளும் ஒரு பொதுவான செரிமானப் பிரச்சனையாகும். இரைப்பை குடலியல் நிபுணர் Dr. வீரேந்திர கவுஜலகி இது குறித்துக் கூறும்போது, நாம் உண்ணும் உணவு முறை, குடல் உணர்திறன் மற்றும் செரிமானக் கோளாறுகள் போன்றவை இதற்கு முக்கியக் காரணமாக அமைகின்றன என்கிறார். குறிப்பாக, மிக வேகமாக உணவை உட்கொள்ளும்போது அதிகப்படியான காற்றை விழுங்குவது, கார்பனேட் பானங்கள் மற்றும் வாயுவை உண்டாக்கும் காய்கறிகளைச் சாப்பிடுவது போன்றவை குடலில் அழுத்தத்தை ஏற்படுத்தி வயிற்றை இறுக்கமாக உணரச் செய்கின்றன.
உணவுப் பழக்கம் மட்டுமின்றி, உடலில் நீரைத் தேக்கி வைக்கும் அதிக சோடியம் கொண்ட பதப்படுத்தப்பட்ட உணவுகளும் வயிறு உப்புசத்திற்கு வழிவகுக்கின்றன. சிலருக்குப் பால் பொருட்கள் (லாக்டோஸ்) அல்லது கோதுமை (குளூட்டன்) போன்ற உணவுகள் ஒவ்வாமையை ஏற்படுத்தி செரிமானத்தைச் சிக்கலாக்கலாம். இதுதவிர, மன அழுத்தம் மற்றும் பெண்களுக்கு ஏற்படும் ஹார்மோன் மாற்றங்கள் குடல் இயக்கத்தைப் பாதிப்பதோடு, ‘எரிச்சல் கொண்ட குடல் நோய்க்குறி’ (IBS) போன்ற பாதிப்புகள் உள்ளவர்களுக்கு இந்தப் பிரச்சனை நாள்பட்ட ஒன்றாக நீடிக்கிறது.
வயிறு உப்புசத்தைச் சரிசெய்ய உணவை நன்றாக மென்று பொறுமையாகச் சாப்பிடும் பழக்கத்தை வளர்த்துக் கொள்ள வேண்டும். போதிய அளவு தண்ணீர் குடிப்பதுடன், நார்ச்சத்துள்ள உணவுகளைப் படிப்படியாக உணவில் சேர்த்துக் கொள்வது செரிமானத்தைச் சீராக்கும். தினமும் நடைப்பயிற்சி மேற்கொள்வது குடலில் வாயு தேங்குவதைக் குறைக்கும்; அதேபோல் தயிர் போன்ற புரோபயாடிக் உணவுகளை உட்கொள்வது குடல் ஆரோக்கியத்தை மேம்படுத்தி செரிமான மண்டலத்தைப் பலப்படுத்தும்.
பெரும்பாலான நேரங்களில் முறையான வாழ்வியல் மாற்றங்கள் மூலம் இதைக் குணப்படுத்த முடியும் என்றாலும், சில சமயம் மருத்துவ ஆலோசனை அவசியமாகிறது. தொடர்ச்சியான வயிறு உப்புசம், கடுமையான வயிற்று வலி, காரணமின்றி உடல் எடை குறைதல் அல்லது மலச்ச சிக்கலில் திடீர் மாற்றங்கள் போன்ற அறிகுறிகள் இருந்தால் அலட்சியப்படுத்தாமல் மருத்துவரை அணுக வேண்டும். முறையான உணவுப் பழக்கம் மற்றும் உடற்பயிற்சி ஆகியவையே ஆரோக்கியமான குடல் இயக்கத்திற்கு அடிப்படைத் தேவைகளாகும்.