அமெரிக்காவிற்கும் ஈரானுக்கும் இடையே நிலவி வரும் போர் பதற்றத்தைத் தணிக்க, அதிபர் டொனால்ட் டிரம்ப் நிர்வாகம் பாகிஸ்தான் வழியாக 15 அம்ச போர்நிறுத்தத் திட்டத்தை ஈரானுக்கு முன்மொழிந்துள்ளதாகத் தகவல்கள் வெளியாகியுள்ளன. இந்தத் திட்டத்தின் கீழ், ஒரு மாத கால தற்காலிகப் போர்நிறுத்தத்திற்கு டிரம்ப் அழைப்பு விடுத்துள்ளார். இதற்குப் பதிலாக, ஈரான் தனது செறிவூட்டப்பட்ட யுரேனியத்தை ஒப்படைக்கவும், மேற்கொண்டு அணு ஆயுதச் சோதனைகளைத் தவிர்க்கவும் நிபந்தனை விதிக்கப்பட்டுள்ளது.
மேலும் ஈரானின் நேர்மறையான சமிக்கையாக, ஹார்முஸ் ஜலசந்தி வழியாகப் பகைமையற்ற கப்பல்கள் பாதுகாப்பாகச் செல்ல அனுமதிப்பதாக ஈரான் உறுதியளித்துள்ளது. இந்த முன்னேற்றத்தை டிரம்ப் ஒரு “விலைமதிப்பற்ற பரிசு” என்று வர்ணித்துள்ளார், இது இரு நாடுகளுக்கும் இடையே அமைதிப் பேச்சுவார்த்தைக்கான கதவுகளைத் திறந்துவிட்டுள்ளது.
இந்த அமைதி முயற்சிகளின் பின்னணியில், ஈரானின் மீதான பொருளாதாரத் தடைகளை நீக்குதல் மற்றும் புஷெர் நகரில் சிவில் அணுசக்தித் திட்டங்களை மேம்படுத்த அமெரிக்கா உதவுதல் போன்ற வாக்குறுதிகள் இடம்பெற்றுள்ளன. இந்த நேர்மறையான சமிக்ஞைகள் வெளியான உடனேயே, சர்வதேசச் சந்தையில் கச்சா எண்ணெய் விலையில் சரிவு ஏற்பட்டுள்ளது, இது உலகப் பொருளாதாரத்திற்கு ஒரு நிம்மதியான செய்தியாகக் கருதப்படுகிறது.
இந்நிலையில் டிரம்ப்பின் செல்வாக்கு உள்நாட்டில் சரிந்து வரும் நிலையில், இந்தப் போர்நிறுத்த முயற்சி அவருக்கு அரசியல் ரீதியாக முக்கியத்துவம் வாய்ந்ததாகப் பார்க்கப்படுகிறது. இருப்பினும், ஈரான் தரப்பில் அதிகாரப்பூர்வமாகப் பேச்சுவார்த்தைகள் இன்னும் உறுதிப்படுத்தப்படவில்லை என்றாலும், மத்திய கிழக்கு பிராந்தியத்தில் நிலவும் பதற்றம் குறையும் என்ற எதிர்பார்ப்பு அதிகரித்துள்ளது.