தமிழக வெற்றிக் கழகத்தின் பொதுச்செயலாளர் புஸ்ஸி ஆனந்த், 2026 சட்டப்பேரவைத் தேர்தலில் சென்னை தி.நகர் தொகுதியில் போட்டியிடவுள்ள நிலையில், அவரது சொத்து விவரங்கள் தற்போது வெளியாகியுள்ளன. இவர் தாக்கல் செய்துள்ள பிரமாணப் பத்திரத்தின்படி, 2024-25 நிதியாண்டில் இவரது ஆண்டு வருமானம் ₹7,25,000 ஆக உள்ளது. அசையும் மற்றும் அசையா சொத்துகளின் மொத்த மதிப்பு ₹2,04,91,418 எனக் குறிப்பிடப்பட்டுள்ளது. வாகனங்களைப் பொறுத்தவரை, ஒரு ஹோண்டா ஆக்டிவா இருசக்கர வாகனம், டொயோட்டா இன்னோவா மற்றும் மாருதி ஸ்விஃப்ட் கார்களை அவர் வைத்துள்ளார். மேலும், அவரிடம் 88 கிராம் தங்கமும், அவரது மனைவியிடம் 1,240 கிராம் தங்க நகைகளும் இருப்பதாகத் தெரிவிக்கப்பட்டுள்ளது.
கட்சியின் தலைவர் விஜய் நேற்று தாக்கல் செய்த பிரமாணப் பத்திரத்தின் வாயிலாக, புஸ்ஸி ஆனந்திற்கு அவர் ₹3 கோடி கடன் வழங்கியிருப்பது தெரியவந்துள்ளது. விஜய் தனது குடும்ப உறுப்பினர்களுக்கே கடன் வழங்கியுள்ள நிலையில், கடந்த 25 ஆண்டுகளாகத் தனது குடும்பத்தினர் பெயரில் எந்தச் சொத்தும் வாங்கவில்லை என்ற தகவல் முன்னரே வெளியாகிப் பரபரப்பை ஏற்படுத்தியது. தற்போது புஸ்ஸி ஆனந்தின் சொத்து விவரங்களும் வெளியாகியுள்ள நிலையில், தி.நகர் தொகுதியில் அவர் களம் காண்பது அக்கட்சியினரிடையே பெரும் எதிர்பார்ப்பை உருவாக்கியுள்ளது. தமிழக அரசியலில் தவெக-வின் முதல் தேர்தல் களம் என்பதால், முக்கிய நிர்வாகிகளின் இந்த நிதிநிலைத் தகவல்கள் பொதுமக்களிடையே கூர்ந்து கவனிக்கப்படுகின்றன.