“மீண்டும் பதற்றம்… கடலுக்கு அடியில் மறைத்து வைக்கப்பட்டிருந்த அதிபயங்கர ஆயுதங்கள்”… ஈரான் வெளியிட்ட பகீர் வீடியோ….

ஈரான் தனது கட்டுப்பாட்டில் உள்ள ஹார்முஸ் ஜலசந்தியில், உலகளாவிய எண்ணெய் விநியோகத்தை முடக்கும் வகையில் புதிய போர் உத்திகளைக் கையாண்டு வருகிறது. உலகின் 20 சதவீத எண்ணெய் போக்குவரத்து நடைபெறும் இந்த முக்கிய பாதையை மூடியுள்ள ஈரான், கப்பல்கள் செல்வதைத் தடுப்பதற்காகத் தற்கொலைப்படை டிரோன் படகுகளை பெருமளவில் தயார் நிலையில் வைத்துள்ளதாக அறிவித்துள்ளது. இதற்காக, பூமிக்கு அடியில் அமைக்கப்பட்ட பிரம்மாண்டமான “ஏவுகனை நகரம்” குறித்த காட்சிகளை அந்நாட்டு அரசுத் தொலைக்காட்சி வெளியிட்டுள்ளது.

வெளியிடப்பட்ட வீடியோவில், நீண்ட சுரங்கப்பாதைகளுக்குள் கடற்படை டிரோன்கள், கப்பல் எதிர்ப்பு ஏவுகணைகள் மற்றும் கடல் கண்ணிவெடிகள் வரிசையாக அடுக்கி வைக்கப்பட்டுள்ளதைக் காண முடிகிறது. ஆளே இல்லாமல் இயக்கப்படும் இந்தத் தற்கொலைப்படை படகுகள் (USVs), வெடிபொருட்களைச் சுமந்து சென்று இலக்கின் மீது மோதி வெடிக்கும் வகையில் வடிவமைக்கப்பட்டுள்ளன. ஏற்கனவே பாரசீக வளைகுடாவில் எண்ணெய் டேங்கர் கப்பல்கள் மீது இத்தகைய தாக்குதல்கள் நடந்துள்ள நிலையில், ஈரானின் இந்த அதிரடி நடவடிக்கை சர்வதேச அளவில் பெரும் பதற்றத்தை ஏற்படுத்தியுள்ளது.

மார்ச் மாத தொடக்கத்தில் ஓமன் கடற்கரை மற்றும் ஈராக் துறைமுகம் அருகே நடந்த எண்ணெய் டேங்கர் கப்பல்கள் மீதான தாக்குதல்கள், இந்தத் தற்கொலைப்படை டிரோன்களின் திறனை உறுதிப்படுத்தியுள்ளன. இத்தகைய தாக்குதல்களால் போக்குவரத்து முடங்கியுள்ள சூழலில், உலக சந்தையில் கச்சா எண்ணெய் விலை ஒரு பேரலுக்கு 200 டாலர் வரை உயர வாய்ப்புள்ளதாக ஈரான் அதிகாரிகள் எச்சரித்துள்ளனர். உக்ரைன்-ரஷ்யா போர் மற்றும் செங்கடல் பகுதியில் ஹூதி கிளர்ச்சியாளர்கள் பயன்படுத்திய அதே உத்தியை ஈரான் தற்போது கையாள்வது உலக நாடுகளிடையே கவலையை அதிகரித்துள்ளது.

ஈரானின் இந்தச் செயல்பாடுகள் போர்ச் சூழலை மேலும் தீவிரப்படுத்தியுள்ளன. ஹார்முஸ் ஜலசந்தி வழியாக எண்ணெய் கொண்டு செல்வதைத் தடுப்போம் என ஈரான் வெளிப்படையாகவே அறிவித்திருப்பது, எரிசக்தி சந்தையில் பெரும் தாக்கத்தை ஏற்படுத்தும் என எதிர்பார்க்கப்படுகிறது. இருப்பினும், ஈரான் வெளியிட்ட இந்த வீடியோக்கள் எப்போது எடுக்கப்பட்டன என்பது குறித்தோ அல்லது இந்த ஆயுதத் தளங்கள் ஏற்கனவே தாக்கப்பட்டுள்ளதா என்பது குறித்த தெளிவான தகவல்கள் இன்னும் வெளியாகவில்லை.