ஈரானின் புதிய உச்ச தலைவராகப் பொறுப்பேற்றுள்ள மொஜ்தபா கமேனியின் பாதுகாப்பு தற்போதைய சூழலில் உலக நாடுகளிடையே பெரும் விவாதத்தை உருவாக்கியுள்ளது. அமெரிக்கா மற்றும் இஸ்ரேலின் தொடர் அச்சுறுத்தல்களுக்கு மத்தியில், அவர் எங்கே இருக்கிறார், எந்நிலையில் உள்ளார் என்பது மர்மமாகவே உள்ளது. அவரைப் பற்றிய துல்லியமான தகவல்களை வழங்குவோருக்கு 10 மில்லியன் டாலர் வரை வெகுமதி வழங்கப்படும் என்று அமெரிக்கா அறிவித்துள்ளது, இதன் மூலம் ஈரானின் உச்ச தலைமைக்கு எவ்வளவு பெரிய நெருக்கடி உள்ளது என்பதை உணர முடிகிறது.
இந்த இக்கட்டான சூழலில், மொஜ்தபா கமேனியைப் பாதுகாக்கும் பொறுப்பு ‘நோபோ’ (NOPO) எனப்படும் ரகசியப் படையிடம் ஒப்படைக்கப்பட்டுள்ளது. பார்சி மொழியில் ‘Norouyeh Vijeh Pasdaran Vlayat’ என்பதன் சுருக்கமே NOPO ஆகும், இதற்கு ‘ஆட்சியைப் பாதுகாக்கும் சிறப்பு படை’ என்று பொருள். 1991-ம் ஆண்டு உருவாக்கப்பட்ட இப்படை, சாதாரண ராணுவ அமைப்பிலிருந்து முற்றிலும் மாறுபட்டு, மிக உயர்தர போர் பயிற்சியும், இக்கட்டான சூழலில் மின்னல் வேகத்தில் செயல்படும் திறனும் கொண்ட வீரர்களை உள்ளடக்கியது.
ஈரானின் வழக்கமான ராணுவமான ‘ஆர்டெஷ்’ அல்லது புரட்சிகர காவல் படையான ‘ஐஆர்ஜிசி’ (IRGC) ஆகியவற்றிலிருந்து முற்றிலும் தனித்து, ரகசியமாகச் செயல்படுவது இப்படையின் தனிச்சிறப்பாகும். மிகக் குறைந்த எண்ணிக்கையிலான வீரர்களைக் கொண்ட இப்படை, உச்ச தலைவரை எதிரிகள் நெருங்கவிடாமல் தடுப்பதையே தனது முதன்மைப் பணியாகக் கொண்டுள்ளது. கறுப்பு சீருடை அணிந்து வலம் வரும் இவர்கள், உள்நாட்டு கலவரங்களைக் கட்டுப்படுத்துவதிலும், அரசுக்கு எதிரான சவால்களை முறியடிப்பதிலும் முன்னோடியாகத் திகழ்கின்றனர்.
கடந்த காலங்களில் ஈரானில் நடைபெற்ற பல்வேறு போராட்டங்கள் மற்றும் உள்நாட்டு வன்முறைகளை ஒடுக்கியதில் இந்த ‘நோபோ’ படையினரின் பங்கு முக்கியமானது. மனித உரிமை மீறல்களில் ஈடுபடுவதாகக் கூறி அமெரிக்கா இவர்களுக்குத் தடை விதித்திருந்தாலும், ஈரானின் ஆட்சி அதிகாரத்தையும், தலைவர்களின் பாதுகாப்பையும் உறுதி செய்வதில் இவர்களே இன்றும் முதுகெலும்பாகச் செயல்படுகின்றனர். தற்போது மொஜ்தபா கமேனியைப் பாதுகாக்கும் அரணாக இவர்கள் களமிறங்கியிருப்பது, ஈரானின் பாதுகாப்பு வியூகம் எந்தளவுக்குத் தீவிரமடைந்துள்ளது என்பதைக் காட்டுகிறது.