மத்திய கிழக்கில் ஈரான் மீது வெடித்துள்ள போர், வெறும் எல்லை மோதலாகத் தேங்கிவிடாமல், இன்று உலகின் ஒவ்வொரு வீட்டிற்குள்ளும் ஊடுருவியுள்ளது. ‘நியூயார்க் டைம்ஸ்’ வெளியிட்டுள்ள ஆய்வின்படி, உலக உர விநியோகத்தில் மூன்றில் ஒரு பங்கு தங்கியிருக்கும் ஹார்முஸ் ஜலசந்தி முடங்கியுள்ளதால், ஆஸ்திரேலியாவின் கோதுமை உற்பத்தி முதல் பிரேசிலின் சர்க்கரை ஆலைகள் வரை அனைத்தும் பாதிக்கப்பட்டுள்ளன. எரிசக்தி தட்டுப்பாட்டைச் சமாளிக்க பிரேசில் சர்க்கரைக்கு பதில் பயோ-ஃபியூயல் தயாரிக்கத் தொடங்கியுள்ளதால், உலக சந்தையில் இனிப்புப் பொருட்களின் விலை உயரும் அபாயம் ஏற்பட்டுள்ளது. இது உலகளாவிய உணவுப் பாதுகாப்பிற்கு விடுக்கப்பட்டுள்ள பெரும் எச்சரிக்கையாகப் பார்க்கப்படுகிறது.
எரிசக்தி நெருக்கடியைச் சமாளிக்க நாடுகள் எடுத்துவரும் விசித்திரமான நடவடிக்கைகள் வியப்பை ஏற்படுத்துகின்றன. தென் கொரியா தனது குடிமக்களைக் குறைந்த நேரம் குளிக்குமாறு (Shorter showers) அறிவுறுத்தியுள்ளது; தாய்லாந்து அரசு ஏசி பயன்பாட்டைக் குறைக்க அமைச்சர்களை அரைக்கை சட்டைகள் அணியச் சொல்லியுள்ளது. பிலிப்பைன்ஸ் லிஃப்ட் பயன்பாட்டைத் தவிர்க்கவும், எகிப்து கடைகளின் வேலை நேரத்தைக் குறைக்கவும் உத்தரவிட்டுள்ளன. மேலும், லாவோஸ் மற்றும் இலங்கை போன்ற நாடுகள் எரிபொருள் சிக்கனத்திற்காகப் பள்ளிகள் மற்றும் அலுவலகங்களுக்குக் கூடுதல் விடுமுறை அளிக்கும் நிலைக்குத் தள்ளப்பட்டுள்ளன.
வர்த்தக ரீதியாகப் பார்க்கையில், வங்கதேசத்தின் பின்னலாடை ஏற்றுமதி விமானப் போக்குவரத்து முடக்கத்தால் தேங்கிக் கிடக்கிறது. மிக முக்கியமாக, துபாய் மற்றும் தோஹா போன்ற சரக்கு மையங்கள் மூடப்பட்டுள்ளதால், புற்றுநோய் உள்ளிட்ட நோய்களுக்கான உயிர் காக்கும் மருந்துகள் நோயாளிகளைச் சென்றடைவதில் சிக்கல் ஏற்பட்டுள்ளது. பொருளாதார ரீதியாக, அமெரிக்காவில் வீட்டுக் கடன் வட்டி விகிதங்கள் உயர்ந்துள்ளதால் சாமானியர்கள் வீடு வாங்குவது கடினமாகியுள்ளது. முதலீட்டாளர்கள் பணப்புழக்கத்திற்காகத் தங்கத்தை விற்பனை செய்வதால், எதிர்பாராத விதமாகத் தங்கத்தின் விலையில் சரிவு ஏற்பட்டுள்ளது.
இறுதியாக, இந்தப் போர் பொழுதுபோக்கு மற்றும் விளையாட்டுத் துறையையும் விட்டுவைக்கவில்லை. பெட்ரோலியப் பொருட்களின் தட்டுப்பாட்டால் விளையாட்டு உடைகளின் விலை உயர்வதோடு, கத்தாரின் ஹீலியம் ஏற்றுமதி பாதிக்கப்பட்டிருப்பதால் குழந்தைகளுக்கான பலூன்களுக்குக் கூட தட்டுப்பாடு ஏற்படும் சூழல் உருவாகியுள்ளது. சவுதி மற்றும் பஹ்ரைனில் நடைபெறவிருந்த புகழ்பெற்ற ‘ஃபார்முலா-1’ பந்தயங்கள் ரத்து செய்யப்பட்டுள்ளன; ஷகிரா போன்ற உலகப் புகழ்பெற்ற கலைஞர்களின் இசை நிகழ்ச்சிகள் ஒத்திவைக்கப்பட்டுள்ளன. இச்சம்பவங்கள், ஒரு மூலையில் நடக்கும் போர் ஒட்டுமொத்த உலகின் அமைதியையும், பொருளாதாரத்தையும் எவ்வளவு ஆழமாகச் சிதைக்கும் என்பதை நமக்கு உணர்த்துகின்றன.