“ஒரு கப்பலுக்கு ரூ.17 கோடி?”… ஈரானின் 10 அம்ச திட்டம்: அமெரிக்காவுக்கு செக் வைத்த ஈரான்… கலக்கத்தில் உலக நாடுகள்…!

மத்திய கிழக்கில் ஈரான் மற்றும் அமெரிக்கா இடையே நீடித்து வரும் போர் பதற்றம் தற்போது ஒரு முக்கிய திருப்புமுனையை எட்டியுள்ளது. ஆறு வாரங்களுக்கு முன்பு ஈரான் உயர் தலைவர் அலி காமெனி கொல்லப்பட்டதைத் தொடர்ந்து தீவிரமடைந்த இந்த மோதலில், அமெரிக்கா முன்வைத்த 15 அம்ச அமைதித் திட்டத்தை ஈரான் முற்றிலுமாக நிராகரித்துள்ளது. அதற்குப் பதிலாக, பாதுகாப்பு மற்றும் பொருளாதார நிபந்தனைகளை மையமாகக் கொண்ட 10 அம்ச மாற்றுத் திட்டத்தை ஈரான் வெளியிட்டுள்ளது. போரை நிறுத்த ஈரான் முன்வந்துள்ள முதல் முறையாக இது பார்க்கப்பட்டாலும், அதில் உள்ள நிபந்தனைகள் சர்வதேச அளவில் பெரும் விவாதத்தை ஏற்படுத்தியுள்ளன.

ஈரான் முன்வைத்துள்ள 10 அம்ச திட்டத்தில், ஈரான் மீது மீண்டும் தாக்குதல் நடத்தப்படாது என்ற உத்தரவாதம், போருக்கு நிரந்தர முற்றுப்புள்ளி மற்றும் லெபனான் மீதான இஸ்ரேலியத் தாக்குதல்களை நிறுத்துவது போன்றவை முதன்மையான கோரிக்கைகளாக உள்ளன. மேலும், ஈரான் மீதான அனைத்து அமெரிக்கத் தடைகளையும் நீக்க வேண்டும் என்றும் வலியுறுத்தப்பட்டுள்ளது. இதற்குப் ஈடாக, சர்வதேச வர்த்தகத்திற்கு மிகவும் முக்கியமான ஹார்முஸ் நீரிணையை மீண்டும் திறக்க ஈரான் சம்மதம் தெரிவித்துள்ளது. இருப்பினும், அந்த வழியாகச் செல்லும் ஒவ்வொரு கப்பலுக்கும் 2 மில்லியன் டாலர் கட்டணம் விதிக்கப்படும் என்ற நிபந்தனை உலக நாடுகளை அதிரவைத்துள்ளது.

இந்தக் கட்டணத்தின் மூலம் கிடைக்கும் வருவாயை ஓமன் நாட்டுடன் பகிர்ந்து கொள்ளவும், பாதிக்கப்பட்ட இடங்களின் புனரமைப்புப் பணிகளுக்குப் பயன்படுத்தவும் ஈரான் திட்டமிட்டுள்ளது. ஹார்முஸ் நீரிணை வழியாகச் செல்லும் கப்பல்களுக்கான பாதுகாப்பு விதிகளைத் தானே வகுப்பேன் என்றும் ஈரான் தெளிவுபடுத்தியுள்ளது. அமெரிக்காவின் 15 அம்சத் திட்டம் நடைமுறைக்குச் சாத்தியமற்றது என்று விமர்சித்த ஈரான், தனது இந்த 10 அம்சத் திட்டமே பிராந்திய அமைதிக்கு வழிவகுக்கும் என்று நம்புகிறது. ஆனால், ஹார்முஸ் வழித்தடத்தில் கட்டணம் விதிக்கும் ஈரானின் முடிவு சர்வதேச பொருளாதாரத்தில் பெரும் தாக்கத்தை ஏற்படுத்தும் என அஞ்சப்படுகிறது.

தற்போது அமெரிக்க அதிபர் டொனால்டு டிரம்ப் விதித்துள்ள அமைதி ஒப்பந்தத்திற்கான காலக்கெடு முடிவடைய இன்னும் சில மணிநேரங்களே உள்ள நிலையில், ஒட்டுமொத்த உலகமும் அமெரிக்காவின் அடுத்தகட்ட நடவடிக்கையை உற்று நோக்கிக் கொண்டிருக்கிறது. இதற்கிடையில், அமெரிக்கப் பாதுகாப்புத் துறையின் செய்தியாளர் சந்திப்பு திடீரென ரத்து செய்யப்பட்டுள்ளது போர் மேகங்களை மேலும் சூழச் செய்துள்ளது. அமெரிக்கா ஈரானின் நிபந்தனைகளை ஏற்குமா அல்லது மீண்டும் ஒரு தாக்குதலைத் தொடங்குமா என்பது இன்னும் 20 மணி நேரத்தில் தெரியவரும் என்பதால், மத்திய கிழக்கில் உச்சகட்ட பரபரப்பு நிலவுகிறது.