“ஏலே டிரம்ப்பே எங்களை தொட்டா பேரழிவு தான்”…. அமெரிக்காவுக்கு ஈரான் ராணுவம் விடுத்த எச்சரிக்கை…. உலகிற்கு காத்திருக்கும் பேராபத்து….!

அமெரிக்கா மற்றும் ஈரான் இடையேயான மோதல் உச்சக்கட்டத்தை எட்டியுள்ள நிலையில், தற்போதைய பதற்றத்தை முடிவுக்கு கொண்டுவர ஈரான் அதிபர் மசூத் பெஷெஷ்கியன் அழைப்பு விடுத்துள்ளார். நேற்றைய தினம் மருத்துவர்களுடனான சந்திப்பில் பேசிய அவர், ஈரான் தற்போது வலிமையோடும் மரியாதையோடும் திகழ்வதால், இந்த மோதலை இப்போதே முடிவுக்கு கொண்டுவருவதுதான் இரு தரப்பிற்கும் சிறந்தது என்று சுட்டிக்காட்டினார். ஈரானின் வெற்றியை உலக நாடுகள் ஏற்றுக்கொண்டுள்ளதாகக் குறிப்பிட்ட அவர், நாட்டின் பள்ளிகள், மருத்துவமனைகள் மற்றும் உள்கட்டமைப்புகள் மீது அமெரிக்கா நடத்திய தாக்குதல்கள் சர்வதேச விதிகளை மீறிய செயல் என கடுமையாகக் குற்றம்சாட்டினார். உச்ச தலைவர் மொஜ்தபா கமெனியின் வழிகாட்டுதலில் செயல்படும் பெஷெஷ்கியன், அமெரிக்காவுடனான ஒப்பந்தத்தில் ஈரானின் சரணடைதல் எதுவுமில்லை என்றும், வழங்கப்பட்ட உறுதிமொழிகள் அனைத்தும் எதிர்தரப்புக்கே உரியவை என்றும் தெளிவுபடுத்தினார்.

அதிபரின் அமைதி அழைப்பு ஒருபுறமிருக்க, எந்தவொரு புதிய அச்சுறுத்தலையும் எதிர்கொள்ளத் தயார் என ஈரானிய ராணுவம் எச்சரித்துள்ளது. ஈரானின் ஆயுதப் படைகளின் தலைமைத் தளபதி மேஜர் ஜெனரல் அலி அப்துல்லாஹி தெரிவிக்கையில், தரை, கடல், வான் மற்றும் இணையவழித் திறன்களுடன் படைகள் முழு வீச்சில் தயாராக இருப்பதாகக் கூறினார். எதிரியிடமிருந்து ஏதேனும் புதிய அச்சுறுத்தல் உருவானால், அதற்கு பேரழிவை ஏற்படுத்தக்கூடிய வகையில் பலமான பதிலடி கொடுக்கப்படும் என அவர் உறுதியளித்தார். தூதரக ரீதியிலான பேச்சுவார்த்தைகள் தற்காலிகமாக முடங்கியிருந்தாலும், ராணுவ ரீதியாக எந்தவொரு சவாலையும் சந்திக்க ஈரான் தயாராகவே உள்ளது என்பதை இந்நடவடிக்கை காட்டுகிறது.

இதற்கிடையே, உலகின் மிக முக்கியமான கடல் வழியான ஹார்முஸ் ஜலசந்தியில் பதற்றம் நாளுக்கு நாள் அதிகரித்து வருகிறது. ஓமன் மற்றும் ஈரான் வெளியுறவு அமைச்சர்கள் தொலைபேசி வழியாக பேச்சுவார்த்தை நடத்தி, இப்பகுதியில் அமைதியைத் திரும்பக் கொண்டுவருவது குறித்தும் கப்பல் போக்குவரத்தின் பாதுகாப்பு குறித்தும் விவாதித்தனர். டெஹ்ரான் இந்த நீர்வழியை பகுதியளவு முற்றுகையிட்டுள்ள போதிலும், அமெரிக்க கடற்படை அதற்கு எதிராகக் செயல்பட்டு வருகிறது. தெற்குப் பகுதி வழியாக எண்ணெய் கப்பல்களுக்குப் பாதுகாப்பான பாதையை வழங்கி, தினசரி 5 மில்லியன் முதல் 10 மில்லியன் பீப்பாய்கள் வரையிலான எண்ணெய் ஏற்றுமதியை அமெரிக்கா உறுதி செய்து வருவதாகத் தகவல்கள் தெரிவிக்கின்றன.

அமெரிக்க தரப்பில், அதிபர் டொனால்ட் ட்ரம்ப் ஈரானின் சமாதான விருப்பத்தை சந்தேகக் கண்ணோட்டத்துடனேயே அணுகுகிறார். வாஷிங்டனில் ஊடகங்களிடம் பேசிய அவர், ஹார்முஸ் ஜலசந்தி உள்ளிட்ட முழுப் பகுதியும் அமெரிக்காவின் முழுமையான கட்டுப்பாட்டில் இருப்பதாக உரிமை கோரினார். ஈரான் ஒரு உடன்பாட்டிற்கு வர விரும்பினாலும், அது ஒரு நியாயமான ஒப்பந்தத்திற்கு இன்னும் தயாராகவில்லை என்பதே தனது கருத்து என்று அவர் குறிப்பிட்டதுடன், நிலைமையை அமெரிக்கா கூர்ந்து கவனித்து வருவதாகவும் தெரிவித்தார். மேலும், ஈரானுக்கு ஏதேனும் ஒரு வகையில் உதவியோ ஆதரவோ வழங்கும் நாடுகள் கடுமையான பொருளாதார விளைவுகளைச் சந்திக்க நேரிடும் என்றும் ட்ரம்ப் எச்சரித்துள்ளார்.