ஈரானிய உச்ச தேசிய பாதுகாப்பு கவுன்சிலின் செயலாளர் அலி லாரிஜானி, உலக முஸ்லிம்களுக்கு எழுதியுள்ள கடிதத்தில் இஸ்லாமிய நாடுகளின் மெத்தனப் போக்கை மிகக் கடுமையாக விமர்சித்துள்ளார். அமெரிக்கா மற்றும் இஸ்ரேலின் “ஏமாற்றும் ஆக்கிரமிப்பு” காரணமாக ஈரானின் முக்கியத் தலைவர்கள் மற்றும் பொதுமக்கள் கொல்லப்பட்டபோது, பெரும்பாலான இஸ்லாமிய நாடுகள் வேடிக்கை மட்டுமே பார்த்ததாக அவர் வருத்தத்துடன் தெரிவித்துள்ளார். “ஒரு முஸ்லிமின் கூக்குரலுக்கு நீங்கள் பதிலளிக்கவில்லை என்றால், நீங்கள் ஒரு முஸ்லிம் அல்ல” என்ற நபிமொழியைச் சுட்டிக்காட்டி, ஈரானுக்கு உதவ முன்வராத நாடுகளின் தார்மீகப் பொறுப்பை அவர் கேள்விக்குட்படுத்தியுள்ளார்.
குறிப்பாக, அமெரிக்க ராணுவத் தளங்களுக்கு இடமளித்து, ஈரானுக்கு எதிரான தாக்குதல்களுக்குத் துணைபோகும் நாடுகளை லாரிஜானி எச்சரித்துள்ளார். தற்போதைய போரில் ஒருபுறம் அமெரிக்காவும் இஸ்ரேலும், மறுபுறம் ஈரானும் அதன் எதிர்ப்பு சக்திகளும் நிற்பதாகக் குறிப்பிட்ட அவர், “நீங்கள் யார் பக்கம்?” என்ற நேரடி வினாவை எழுப்பியுள்ளார். ஈரான் மற்ற நாடுகளை ஆதிக்கம் செலுத்தும் எண்ணம் கொண்டதல்ல என்றும், வாஷிங்டன் மற்றும் டெல் அவிவ் உடனான இணக்கத்தை விட ‘இஸ்லாமிய உம்மா’வின் ஒற்றுமையே பாதுகாப்பிற்கு உத்தரவாதம் என்றும் அவர் தனது கடிதத்தில் வலியுறுத்தியுள்ளார்.
இதற்கிடையில், மத்திய கிழக்கில் நிலவும் பதற்றம் போர் தொடங்கி 17 நாட்களை எட்டியுள்ள நிலையில், தேவையான அளவுக்குப் போரை விரிவுபடுத்தத் தயாராக இருப்பதாக ஈரான் அறிவித்துள்ளது. ஹார்முஸ் ஜலசந்தியை மீண்டும் திறக்க நேட்டோ படைகளைப் பயன்படுத்தும் திட்டத்தை ஐரோப்பிய நாடுகள் நிராகரித்துள்ள நிலையில், ஈரானின் வெளியுறவு அமைச்சர் அப்பாஸ் அரக்சி தங்களது தற்காப்புத் திறனை உறுதிபடத் தெரிவித்துள்ளார். மறுபுறம், ஈரானில் இன்னும் ஆயிரக்கணக்கான இலக்குகளைத் தாங்கள் கண்டறிந்துள்ளதாக இஸ்ரேலிய ராணுவம் தெரிவித்துள்ளதால், இப்பகுதியில் போர் மேகங்கள் மேலும் சூழ்ந்துள்ளன.