ஒடிசா மாநிலம் கோர்தா (Khorda) மாவட்டத்திற்குட்பட்ட பாக்மாரி காவல் நிலையப் பகுதியில், மதுபோதையில் இருந்த இரு இளைஞர்கள் பொது இடத்தில் ரகளை செய்து பொதுமக்களுக்கு இடையூறு ஏற்படுத்தியுள்ளனர். இதுகுறித்து உள்ளூர் மக்கள் அளித்த தகவலின் பேரில் சம்பவ இடத்திற்கு விரைந்த காவல்துறையினர், அந்த இரு இளைஞர்களையும் கைது செய்தனர். பின்னர், சட்டப்பூர்வ நடவடிக்கைகளுக்காக அவர்களை மருத்துவப் பரிசோதனை செய்ய கோர்தா மாவட்ட அரசு தலைமை மருத்துவமனைக்குக் கூட்டிச் சென்றனர்.
மருத்துவமனையில் பரிசோதனை நடந்து கொண்டிருந்தபோது, எதிர்பாராத விதமாக அந்த இளைஞர்கள் அங்கிருந்த காவல் அதிகாரிகளுடன் கடுமையான வாக்குவாதத்தில் ஈடுபட்டனர். வாக்குவாதம் முற்றிய நிலையில், ஆத்திரமடைந்த ஒரு வாலிபர் பாதுகாப்புப் பணியில் இருந்த காவல் அதிகாரியின் கன்னத்தில் பலாரென அறைந்தார். மேலும், அங்கிருந்த மற்ற அதிகாரிகளையும் அவர்கள் தாக்க முயன்றதால் மருத்துவமனை வளாகத்தில் பெரும் பரபரப்பும், நோயாளிகளிடையே அச்சமும் ஏற்பட்டது.
இந்தத் தாக்குதல் சம்பவத்தை அங்கிருந்தவர்கள் தங்கள் மொபைல் போனில் வீடியோவாகப் பதிவு செய்து சமூக ஊடகங்களில் பகிர, அது தற்போது இணையத்தில் தீயாய் பரவி வருகிறது. நிலைமை கட்டுப்பாட்டை மீறிச் சென்றதால், பாக்மாரி போலீஸார் உடனடியாக கோர்தா டவுன் போலீஸாரின் உதவியை நாடினர். கூடுதல் போலீஸார் விரைந்து வந்து அந்த இரு இளைஞர்களையும் மடக்கிப் பிடித்து மீண்டும் காவலில் எடுத்தனர். அரசு ஊழியரைத் தாக்கியது மற்றும் பணி செய்யவிடாமல் தடுத்தது ஆகிய பிரிவுகளின் கீழ் அவர்கள் மீது தற்போது தீவிர விசாரணை மேற்கொள்ளப்பட்டு வருகிறது.