சென்னையில் பயங்கரம்..! சேலை வியாபாரம் செய்துவந்த இன்ஸ்டாகிராம் பிரபலம் வெட்டிக்கொலை… கொலை செய்துவிட்டு கணவரும் தற்கொலை..!!

சென்னை நங்கநல்லூரில் வசித்து வந்த பிரபல இன்ஸ்டாகிராம் இன்ஃப்ளூயன்சர் மற்றும் தொழிலதிபரான நாகலட்சுமி (42), அவரது கணவர் சுப்பிரமணியனால் (52) வெட்டிக்கொலை செய்யப்பட்டார். மனைவியைக் கொலை செய்த பின் சுப்பிரமணியன் தானும் தூக்கிட்டு தற்கொலை செய்துகொண்டார். ஏப்ரல் 27 அன்று இவர்களது இளைய மகன் சாய்லாஷ் வீட்டிற்கு வந்தபோது, பெற்றோர் இருவரும் உயிரிழந்து கிடப்பதைக் கண்டு அதிர்ச்சியடைந்து காவல்துறையினருக்குத் தகவல் தெரிவித்தார்.

நாகலட்சுமி ‘ஸ்ரீ சாய் சில்க்ஸ்’ என்ற புடவை வணிகத்தை நடத்தி வந்தவர். இன்ஸ்டாகிராமில் மூன்று லட்சத்திற்கும் அதிகமான பின்தொடர்பவர்களைக் கொண்டிருந்த அவர், தனது கடின உழைப்பால் தொழிலைப் பெரிய அளவில் விரிவுபடுத்தியிருந்தார். கருத்து வேறுபாடு காரணமாக கணவரைப் பிரிந்து சென்னையில் தனியாக வாழ்ந்து வந்த நிலையில், சுப்பிரமணியன் மதுரையில் தங்கியிருந்தார். சமீபத்தில் தனது செயலுக்கு மன்னிப்புக் கேட்டு நாகலட்சுமியுடன் மீண்டும் இணைந்து வாழத் தொடங்கிய சில நாட்களிலேயே இந்த விபரீதம் நிகழ்ந்துள்ளது.

சம்பவம் நடந்த அன்று தம்பதியினருக்கு இடையே ஏற்பட்ட வாக்குவாதம் கொலையில் முடிந்ததாக முதற்கட்ட விசாரணையில் தெரியவந்துள்ளது. இவர்களுக்கு இரண்டு மகன்கள் உள்ளனர்; மூத்த மகன் ரஷ்யாவில் மருத்துவம் படித்து வருகிறார், இளைய மகன் சென்னையில் முதலாம் ஆண்டு பல் மருத்துவம் படித்து வருகிறார். உயிரிழந்தவர்களின் உடல்களைக் கைப்பற்றிய காவல்துறை, செங்கல்பட்டு அரசு மருத்துவமனைக்கு உடற்கூறாய்வுக்காக அனுப்பி வைத்துவிட்டு, இந்த துயரச் சம்பவம் குறித்து தீவிர விசாரணை மேற்கொண்டு வருகின்றனர்.