உலகெங்கும் உள்ள முன்னணி ஐடி நிறுவனங்கள் செயற்கை நுண்ணறிவு (AI) வருகையினால் பணியாளர்களைக் குறைத்து வரும் நிலையில், இன்போசிஸ் நிறுவனம் அதற்கு நேர்மாறான ஒரு நம்பிக்கையூட்டும் அணுகுமுறையை கையில் எடுத்துள்ளது. இது குறித்துப் பேசிய இன்போசிஸ் சிஇஓ சலில் பாரீக், தங்கள் நிறுவனத்தில் பணிநீக்கம் (Layoff) செய்யும் திட்டம் ஏதும் இல்லை என்றும், கடந்த ஓராண்டில் ஒரு ஊழியரைக் கூட இந்த காரணத்திற்காக நீக்கவில்லை என்றும் உறுதிபடத் தெரிவித்துள்ளார். கூகுள், மெட்டா, மைக்ரோசாப்ட் போன்ற ஜாம்பவான்களே ஆட்குறைப்பில் ஈடுபட்டு வரும் சூழலில், இன்போசிஸின் இந்த அறிவிப்பு ஊழியர்கள் மத்தியில் நிலவி வந்த வேலை இழப்பு அச்சத்தைப் போக்கியுள்ளது.
இந்த உத்தியின் ஒரு பகுதியாக, நடப்பு ஆண்டில் சுமார் 20,000 புதிய பட்டதாரிகளை (Freshers) கல்லூரி வளாக நேர்காணல் மூலம் பணியமர்த்த இன்போசிஸ் திட்டமிட்டுள்ளது. AI தொழில்நுட்பத்தால் எளிமையான கோடிங் வேலைகள் குறைந்தாலும், புதிய பணியாளர்களுக்கு சிக்கலான மற்றும் மதிப்புமிக்க பணிகளை மேற்கொள்ளும் வகையில் சிறப்புப் பயிற்சிகளை வழங்க நிறுவனம் முடிவு செய்துள்ளது. இதற்காக ஊழியர்களுக்குப் பெரும் முதலீட்டில் திறன் மேம்பாட்டு (Reskilling) பயிற்சிகள் வழங்கப்படுகின்றன. இதன் மூலம் மென்பொருள் பொறியாளர்கள் AI கருவிகளுடன் இணைந்து திறம்பட பணியாற்றும் வல்லமையைப் பெறுவார்கள் என நிர்வாகம் நம்புகிறது.
AI துறையில் உலகளாவிய வளர்ச்சியை எட்ட இன்போசிஸ் நிறுவனம் OpenAI மற்றும் Anthropic போன்ற முன்னணி நிறுவனங்களுடன் முக்கிய ஒப்பந்தங்களை மேற்கொண்டுள்ளது. தற்போது இன்போசிஸின் மொத்த வருவாயில் AI பிரிவின் பங்களிப்பு 5.5 சதவீதமாக உயர்ந்துள்ளது. தனது சொந்த தளமான ‘Topaz Fabric’ மூலம் பெரிய அளவிலான மென்பொருள் சேவைகளை ஒருங்கிணைத்து வரும் இன்போசிஸ், எதிர்கால வளர்ச்சிக்கு AI-யை ஒரு முக்கிய சக்தியாகப் பார்க்கிறது. டிசிஎஸ், ஹெச்சிஎல் போன்ற உள்நாட்டு நிறுவனங்களே ஊழியர் எண்ணிக்கையைச் சீரமைத்து வரும் நிலையில், இன்போசிஸின் இந்த ஆக்கப்பூர்வமான நகர்வு ஐடி துறையில் புதிய மாற்றத்தை ஏற்படுத்தியுள்ளது.