PMO-வுக்குப் போன ரகசியக் கடிதம்… மீண்டும் மெகா மோசடி.. தனியார் வங்கியில் அம்பலமான ரூ.53 கோடி ரகசிய ஊழல்….மோடி, ஆர்பிஐ வரை பறந்த கடிதம்…!

இந்தியாவின் முன்னணி தனியார் வங்கிகளில் ஒன்றான இண்டஸ்இண்ட் வங்கி (IndusInd Bank) மீண்டும் ஒரு கடுமையான இக்கட்டான சூழலில் சிக்கியுள்ளது. ஏற்கனவே இந்த வங்கியில் சுமார் 2,000 கோடி ரூபாய் மதிப்பிலான டெரிவேட்டிவ்ஸ் (Derivatives) வர்த்தகத்தில் கணக்கியல் குளறுபடிகள் வெளிச்சத்திற்கு வந்து பெரும் சர்ச்சை நீடித்து வருகிறது. இந்த நிலையில், வங்கியின் மூத்த அதிகாரியும், அவரது குடும்பமும் சேர்ந்து செய்துள்ள கூட்டு முறைகேடுகள் குறித்து அடையாளம் தெரியாத நபர் ஒருவர் ‘விசில்ப்ளோயர்’ (Whistleblower) புகார் அளித்துள்ளது வங்கித்துறையிலும் முதலீட்டாளர்கள் மத்தியிலும் பெரும் அதிர்ச்சியை ஏற்படுத்தியுள்ளது.

கடந்த மே மாத இறுதியில் அனுப்பப்பட்டுள்ள இந்த ரகசியப் புகாரில், இண்டஸ்இண்ட் வங்கியின் முன்னாள் கிழக்கு இந்திய மண்டலத் தலைவர் சமீர் அகர்வால் மீது மிக முக்கியக் குற்றச்சாட்டு முன்வைக்கப்பட்டுள்ளது. அவர் வங்கியின் மிக முக்கிய கார்ப்பரேட் கடன் விபரங்கள் மற்றும் பொதுமக்களுக்குத் தெரியாத ரகசியமான தகவல்களை (Confidential Information) முன்கூட்டியே தெரிந்து வைத்துள்ளார். இத்தகைய அதிகாரப்பூர்வ அறிவிப்புகள் பொதுவெளியில் வெளியாவதற்கு முன்பாகவே, இன்சைடர் டிரேடிங் (Insider Trading) எனப்படும் சட்டவிரோதப் பங்கு வர்த்தகத்தில் ஈடுபடுவதற்காக அந்தத் தகவல்களைத் தனது குடும்பத்தினருக்கும், தனக்குத் தொடர்புடைய நிறுவனங்களுக்கும் பகிர்ந்துள்ளார் என்று அந்த கடிதத்தில் தெரிவிக்கப்பட்டுள்ளது.

இந்த ரகசியத் தகவல்களைப் பயன்படுத்தி, சமீர் அகர்வாலின் குடும்பத்தினர் சுமார் 815 கோடி ரூபாய் மதிப்பிலான பங்குகளை முன்கூட்டியே வர்த்தகம் செய்து, அதன் மூலம் தோராயமாக 46 கோடி ரூபாய் வரை லாபம் ஈட்டியுள்ளதாகக் கூறப்பட்டுள்ளது. இதற்கு ஆதாரமாக, சமீர் அகர்வாலின் கடன் போர்ட்ஃபோலியோ பரிசீலனையின் கீழ் இருந்த ‘கேசோராம் இண்டஸ்ட்ரீஸ்’ (Kesoram Industries) நிறுவனத்தின் மெகா வர்த்தக ஒப்பந்தம் வெளியாவதற்கு முன்பே, அவரது மனைவி அந்நிறுவனத்தின் 34 லட்சத்திற்கும் அதிகமான பங்குகளை வாங்கியுள்ளார். இந்த ஒற்றைப் பரிவர்த்தனை மூலம் மட்டுமே அவருக்கு 3.26 கோடி ரூபாய் லாபம் கிடைத்துள்ளது. ஒட்டுமொத்தமாக, அவரது குடும்பம் சுமார் 816 கோடி ரூபாய் வரை இத்தகைய வர்த்தகத்தில் ஈடுபட்டு, மொத்தம் 53 கோடி ரூபாய்க்கும் அதிகமாக லாபம் அள்ளியுள்ளதாக அந்தப் புகாரில் சுட்டிக்காட்டப்பட்டுள்ளது.

இந்த விவகாரம் குறித்து இண்டஸ்இண்ட் வங்கி தற்பொழுது தனது அதிகாரப்பூர்வப் பதிலை அளித்துள்ளது. ரகசியப் புகார்தாரர் கூறியுள்ள அனைத்துக் குற்றச்சாட்டுகளையும் வங்கியின் நிர்வாகம் முற்றிலும் நிராகரிப்பதாகத் திட்டவட்டமாகத் தெரிவித்துள்ளது. மேலும், புகாரில் எழுப்பப்பட்டுள்ள அனைத்துக் கவலைகளும் வங்கியின் உள்நாட்டுக் கொள்கைகள் மற்றும் சட்ட விதிகளின்படி ஏற்கனவே முறையாக ஆய்வு செய்யப்பட்டு, அதற்குரிய தகுந்த நடவடிக்கைகள் எடுக்கப்பட்டுவிட்டன என்றும் வங்கி நிர்வாகத் தரப்பில் விளக்கம் அளிக்கப்பட்டுள்ளது.

இருப்பினும், இந்த விவகாரம் தொடர்பாக விரிவான விசாரணை நடத்தக் கோரி இந்தியப் பிரதமரின் அலுவலகம் (PMO), இந்திய ரிசர்வ் வங்கி (RBI), தீவிர மோசடி விசாரணை அலுவலகம் (SFIO) மற்றும் தேசிய நிதி நிருபண அதிகாரம் (NFRA) உள்ளிட்ட பல்வேறு முக்கிய ஒழுங்குமுறை அமைப்புகளுக்குப் புகார் கடிதங்கள் அனுப்பப்பட்டுள்ளன. மேலும், வங்கியின் முக்கிய நிதியாதார ஆவணங்களைச் செயற்கையாக மாற்றியமைத்தது, மைக்ரோஃபைனான்ஸ் கடன்களைத் தகுதி இன்றி தொடர்ச்சியாகப் புதுப்பித்து நல்ல கடன்கள் போலக் காட்டியது (Evergreening of loans), மற்றும் உள் தணிக்கை சோதனைகளில் கண்டறியப்பட்ட மோசடிகளை வங்கியின் உயர் மட்ட நிர்வாகக் குழு மூடிமறைக்க முயன்றது போன்ற அதிர்ச்சித் தகவல்களும் அந்தப் புகாரில் குறிப்பிடப்பட்டுள்ளதால் இந்த விவகாரம் தற்பொழுது பெரும் விஸ்வரூபம் எடுத்துள்ளது.