அமெரிக்காவின் நியூஜெர்சி மாநிலத்தில் நடைபெற்ற வீதி விபத்தில் ஹைதராபாத் நகரைச் சேர்ந்த ஸ்ரீபதி தீபா (42) என்ற பெண் சம்பவ இடத்திலேயே பரிதாபமாக உயிரிழந்தார். மென்பொருள் துறையில் பணியாற்றி வந்த இவர், தனது கணவர் ராமகிருஷ்ண ரெட்டியை ரயில் நிலையத்தில் இறக்கிவிட்டுத் திரும்பிய போது, எதிரே வந்த மற்றொரு வாகனம் மோதியதில் இந்தத் துயரச் சம்பவம் நிகழ்ந்துள்ளது. விபத்திற்குக் காரணமான ஓட்டுநரை அந்நாட்டுத் துறையினர் கைது செய்து விசாரணை நடத்தி வருகின்றனர்.
கடந்த 2008-ஆம் ஆண்டு முதல் அமெரிக்காவில் கணவர் மற்றும் இரு குழந்தைகளுடன் வசித்து வந்த தீபா, இன்னும் இரண்டே நாட்களில் சொந்த ஊரான இந்தியாவிற்கு வரத் திட்டமிட்டிருந்தார். அதற்குள்ளாகவே அவர் உயிரிழந்தது குடும்பத்தினரிடையே பெரும் சோகத்தை ஏற்படுத்தியுள்ளது. இறப்பிற்குப் பின் அவரது உடல் உறுப்புகளைத் தானம் செய்ய உறவினர்கள் முன்வந்துள்ள நிலையில், அவரது உடலைத் தாய்நாட்டிற்கு விரைவாகக் கொண்டு வர அரசு உதவ வேண்டும் என வேண்டுகோள் விடுத்துள்ளனர்.