“நீங்கள் முஸ்லிமா?”… ஒரே ஒரு கேள்வி.. அடுத்த நொடியே 15 குத்துக்கள்…. அமெரிக்க மாலில் இந்தியருக்கு நேர்ந்த பயங்கரம்…. பின்னணியில் இருக்கும் திடுக்கிடும் உண்மை…!

அமெரிக்காவின் உட்டா (Utah) மாகாணத்தில் உள்ள ஒரு ஷாப்பிங் மாலில், இந்தியாவைச் சேர்ந்த சோஹைல் என்ற வாலிபர் மீது நடத்தப்பட்ட கொடூரக் கொலைவெறித் தாக்குதல் சர்வதேச அளவில் பெரும் அதிர்ச்சியை ஏற்படுத்தியுள்ளது. மாலில் உள்ள ஒரு கடையில் பணியாற்றி வந்த சோஹைலிடம், அங்கிருந்த நபர் ஒருவர் திடீரென அவரது மதம் மற்றும் நாடு குறித்து விசாரித்துள்ளார். அதற்கு சோஹைல் தான் “இந்தியாவைச் சேர்ந்த முஸ்லிம்” என்று பதிலளித்த அடுத்த கணமே, அந்த நபர் சற்றும் யோசிக்காமல் தனது கையில் வைத்திருந்த கத்தியால் சோஹைலை 15 முறை சரமாரியாகக் குத்திவிட்டு தப்பியோட முயன்றார்.

இந்த கொடூரத் தாக்குதலை நேரில் பார்த்த அவரது சக ஊழியரான லுனா என்பவர், சோஹைலைக் காப்பாற்ற தன் கையில் கிடைத்த காலணிகள் மற்றும் நாற்காலிகளை அந்த வன்முறையாளர் மீது வீசிப் போராடியுள்ளார். எனினும், ஆக்ரோஷமாக நடத்தப்பட்ட இந்த தாக்குதலில் பலத்த காயமடைந்து ரத்த வெள்ளத்தில் சரிந்த சோஹைல், உடனடியாக மீட்கப்பட்டு அருகில் உள்ள மருத்துவமனையில் தீவிர சிகிச்சை பிரிவில் அனுமதிக்கப்பட்டார். தப்பியோட முயன்ற 48 வயதான பீட்டர் மைக்கேல் லார்சன் என்ற அந்தப் பாவி, அங்கிருந்த பொதுமக்களால் விரட்டிப் பிடிக்கப்பட்டு போலீசாரிடம் ஒப்படைக்கப்பட்டார். விசாரணையில், அவர் முஸ்லிம்கள் மீது கடுமையான வெறுப்புக் கொண்டு, அவர்களைக் கொல்லும் நோக்கத்தோடு இந்தத் தாக்குதலை நடத்தியது அம்பலமாகியுள்ளது.

தற்போது சால்ட் லேக் கவுண்ட்டி சிறையில் அடைக்கப்பட்டுள்ள அந்த நபரின் வெறுப்புப் பிரச்சாரத்திற்குப் பலியான சோஹைலின் குடும்பம், தங்களின் வாழ்வாதாரத்தை இழந்து தவித்து வருகிறது. சோஹைலுக்கு மருத்துவக் காப்பீடு (Insurance) இல்லாததாலும், அவரது மனைவி மற்றும் இரு குழந்தைகள் அவரை மட்டுமே நம்பி இருப்பதாலும், அவரது முக்கிய அறுவை சிகிச்சைகளுக்கான செலவை ஈடுகட்ட லுனா ‘GoFundMe’ தளம் மூலம் நிதி திரட்டி வருகிறார். “அவர் உயிர் பிழைத்ததே அற்புதம், அவரது குடும்பத்திற்கு இப்போது நம் உதவி தேவை” என்று லுனா கண்ணீருடன் கோரிக்கை விடுத்துள்ளார்.

இனம் மற்றும் மதத்தின் பெயரால் ஆங்காங்கே அரங்கேறும் இதுபோன்ற வெறுப்புக் குற்றங்கள் மனிதநேயத்திற்கு விடப்பட்ட சவாலாகும். இந்த இக்கட்டான சூழலிலும் சோஹைலின் மேலாளர் அட்னான் முகமது, “என் உயிரைக் கொடுத்தாவது அவரைப் பாதுகாப்பேன், சோஹைலைக் காப்பாற்றிய மாலில் இருந்த மனிதர்களுக்கு நன்றி, இன்னும் மனிதநேயம் உயிர்ப்புடன் தான் இருக்கிறது” என்று நெகிழ்ச்சியோடு குறிப்பிட்டுள்ளார். நாடுகள் பல சட்டங்களைக் கொண்டு வந்தாலும், மக்களின் மனதில் உள்ள இத்தகைய மதவெறி ஒழிந்தால் மட்டுமே உலகளவில் இது போன்ற துயர சம்பவங்களுக்கு முற்றுப்புள்ளி வைக்க முடியும்.