டிரம்ப் அரசின் அதிரடி வேட்டை… சிக்கிய 17 பேரில் இந்தியத் தொழிலதிபர்.. அமெரிக்க வரலாற்றிலேயே இல்லாத விபரீதம்….!

அமெரிக்காவில் சட்டவிரோதமாகக் குடியேறியவர்கள் மற்றும் போலி ஆவணங்கள் மூலம் குடியுரிமை பெற்றவர்களுக்கு எதிராக டொனால்ட் டிரம்ப் தலைமையிலான அரசு கடுமையான நடவடிக்கைகளைத் தீவிரப்படுத்தியுள்ளது. இதன் ஒரு பகுதியாக, மோசடியான முறையில் அமெரிக்கக் குடியுரிமை பெற்றதாகக் கூறி, இந்திய வம்சாவளியைச் சேர்ந்த தொழிலதிபர் ஒருவரின் குடியுரிமையைப் பறிக்க அந்நாட்டு நீதித்துறை சட்ட நடவடிக்கைகளைத் தொடங்கியுள்ளது. அமெரிக்க வரலாற்றிலேயே குடியுரிமை நீக்கம் தொடர்பாக எடுக்கப்படும் மிகப் பெரிய விவகாரங்களில் ஒன்றாகக் கருதப்படும் இந்நடவடிக்கை, அங்கு வாழும் இந்தியர்களிடையே பெரும் அதிர்ச்சியையும் பரப்பரப்பையும் ஏற்படுத்தியுள்ளது.

அமெரிக்க நீதித்துறை கடந்த ஜூன் 8ஆம் தேதி வெளியிட்ட அறிவிப்பின்படி, குழந்தை பாலியல் துஷ்பிரயோகம், போதைப்பொருள் கடத்தல், நிதி மோசடி மற்றும் குடியேற்ற நடைமுறைகளில் முறைகேடு போன்ற தீவிரக் குற்றங்களில் ஈடுபட்ட மொத்தம் 17 பேருக்கு எதிராக இந்தச் சட்ட நடவடிக்கை பாய்ந்துள்ளது. குடியுரிமை பெறும் செயல்முறையின் போது உண்மைகளை மறைத்தல், மோசடி செய்தல் மற்றும் தவறான வாக்குமூலங்களை அளித்தல் போன்ற குற்றச்சாட்டுகள் இவர்கள் மீது சுமத்தப்பட்டுள்ளன. இந்த அதிரடிப் பட்டியலில் நியூ ஜெர்சியைச் சேர்ந்த ‘மேக்னாவிக்ஷன் எல்எல்சி’ (Magnavision LLC) நிறுவனத்தின் சி.இ.ஓ-வான நீரஜ் சர்மா (50) என்ற இந்திய வம்சாவளித் தொழிலதிபரின் பெயரும் இடம்பெற்றுள்ளதுதான் தற்போது முக்கிய பேசுபொருளாக மாறியுள்ளது.

நீரஜ் சர்மா மீது அமெரிக்க நீதித்துறை அடுக்கடுக்கான கடுமையான குற்றச்சாட்டுகளை முன்வைத்துள்ளது. குறிப்பாக, அவர் 11 போலி எச்-1பி (H-1B) விசா விண்ணப்பங்களைச் சமர்ப்பித்ததாகவும், வெளிநாட்டு ஊழியர்களை ஒரு முக்கிய சர்வதேச நிதி நிறுவனத்தில் பணியமர்த்துவதாகத் தவறான வாக்குறுதி அளித்ததாகவும் கூறப்பட்டுள்ளது. மேலும், தனது நிறுவனத்தின் உயர் அதிகாரிகளின் கையொப்பங்களைப் போலியாக உருவாக்கியது மற்றும் போலியான ஆவணங்களைச் சமர்ப்பித்தது போன்ற சட்டவிரோதச் செயல்களிலும் அவர் ஈடுபட்டுள்ளதாக அமெரிக்க அரசு தெரிவித்துள்ளது.

கடந்த 2017ஆம் ஆண்டில் நீரஜ் சர்மா அமெரிக்கக் குடியுரிமைக்கு விண்ணப்பித்தபோது, தான் எந்தவொரு குற்றத்திலும் ஈடுபடவில்லை என்று அதிகாரிகளிடம் பொய்யான தகவல்களை வழங்கியுள்ளார். அதன் அடிப்படையில் டிசம்பர் 2017-ல் அவருக்குக் குடியுரிமையும் கிடைத்துள்ளது. ஆனால், முன்னதாக 2015 முதல் 2017 வரையிலான காலகட்டத்தில் அவர் விசா மோசடி தொடர்பான வழக்கில் தண்டனை பெற்றவர் என்பது தற்போது தெரியவந்துள்ளது. இவ்வாறு தனது குற்றச் செயல்களை வேண்டுமென்றே மறைத்து, அரசை ஏமாற்றிக் குடியுரிமை பெற்றதால், அவரது குடியுரிமையை ரத்து செய்ய வேண்டும் என்று நீதிமன்றத்தில் கோரப்பட்டுள்ளது. குடியுரிமை பெற்றவர்களாக இருந்தாலும், முறைகேடு நிரூபிக்கப்பட்டால் தப்ப முடியாது என்பதை டிரம்ப் அரசின் இந்த அதிரடி நடவடிக்கை உணர்த்துகிறது.