இந்தியாவுக்குப் புதிய சிக்கல்… அமெரிக்காவின் வாஷிங்டனில் இருந்து வந்த ‘ரிப்போர்ட்’.. நம்ப வைத்து முதுகில் குத்திய டிரம்ப்…!

சர்வதேச மதச் சுதந்திரத்திற்கான அமெரிக்க ஆணையம் (USCIRF) வெளியிட்டுள்ள 2026-ஆம் ஆண்டிற்கான வருடாந்திர அறிக்கையில், இந்தியாவை ‘கடுமையான கவலைக்குரிய நாடாக’ (Country of Particular Concern – CPC) அறிவிக்க வேண்டும் என்று அமெரிக்க வெளியுறவுத் துறைக்கு மீண்டும் பரிந்துரை செய்துள்ளது. 2025-ஆம் ஆண்டில் இந்தியாவில் மதச் சிறுபான்மையினரின் நிலை மற்றும் மதச் சுதந்திரம் பெருமளவில் பாதிக்கப்பட்டுள்ளதாக அந்த அறிக்கை சுட்டிக்காட்டுகிறது. கடந்த சில ஆண்டுகளாகவே இக்குழு இத்தகைய பரிந்துரைகளை வழங்கி வரும் நிலையில், இந்த ஆண்டின் அறிக்கையில் பல்வேறு கடுமையான குற்றச்சாட்டுகள் முன்வைக்கப்பட்டுள்ளன.

அமெரிக்க ஆணையத்தின் இந்த அறிக்கையில், இந்தியாவில் கொண்டு வரப்பட்டுள்ள மதமாற்றத் தடைச் சட்டங்கள், குடியுரிமைத் திருத்தச் சட்டம் (CAA) மற்றும் வக்ஃப் வாரிய சட்டத் திருத்தங்கள் போன்ற நடவடிக்கைகள் மதச் சிறுபான்மையினருக்கு எதிராக இருப்பதாகக் குறிப்பிடப்பட்டுள்ளது. மேலும், பசுப் பாதுகாப்பு என்ற பெயரில் நடக்கும் கும்பல் வன்முறைகள் மற்றும் சிறுபான்மையினரின் வழிபாட்டுத் தலங்கள் மீதான தாக்குதல்களை இந்திய அரசு கட்டுப்படுத்தத் தவறிவிட்டதாகவும், சில சமயங்களில் இத்தகைய வன்முறைகள் சகித்துக்கொள்ளப்படுவதாகவும் அந்த அறிக்கை விமர்சித்துள்ளது.

குறிப்பாக, இந்த ஆண்டு அறிக்கையில் ராஷ்டிரிய ஸ்வயம்சேவக் சங்கம் (RSS) மற்றும் இந்தியாவின் உளவு அமைப்பான ‘ரா’ (R&AW) ஆகியவற்றின் மீதான செயல்பாடுகள் குறித்துக் கவலை தெரிவிக்கப்பட்டுள்ளது. மதச் சுதந்திர மீறல்களுக்குப் பொறுப்பான தனிநபர்கள் மற்றும் அமைப்புகள் மீது பொருளாதாரத் தடைகளை விதிக்கவும், அவர்களின் அமெரிக்கப் பயணங்களுக்குத் தடை விதிக்கவும் பரிந்துரைக்கப்பட்டுள்ளது. மேலும், இந்தியாவிற்கு வழங்கப்படும் பாதுகாப்பு உதவிகள் மற்றும் வர்த்தகக் கொள்கைகளை மதச் சுதந்திர மேம்பாட்டுடன் இணைக்க வேண்டும் என்றும் ஆணையம் கேட்டுக் கொண்டுள்ளது.

இருப்பினும், இத்தகைய அறிக்கைகளை இந்திய வெளியுறவுத் துறை அமைச்சகம் தொடர்ந்து நிராகரித்து வருகிறது. இந்தியாவின் பன்முகத்தன்மை மற்றும் ஜனநாயகப் பண்புகளைச் சிதைக்கும் நோக்கில், ஒரு சார்புடைய அமைப்புகளால் இத்தகைய ‘அஜெண்டா’ சார்ந்த அறிக்கைகள் வெளியிடப்படுவதாக இந்தியா தரப்பில் விளக்கம் அளிக்கப்படுகிறது. அமெரிக்க ஆணையத்தின் இந்தப் பரிந்துரைகள் ஒரு சட்டப்பூர்வ ஆலோசனையே தவிர, இதனை ஏற்று இந்தியாவை ‘CPC’ பட்டியலில் சேர்ப்பதா அல்லது வேண்டாமா என்பது குறித்து அமெரிக்க வெளியுறவுத் துறைதான் இறுதி முடிவெடுக்க வேண்டும் என்பது குறிப்பிடத்தக்கது.