இந்தியாவின் தலையெழுத்தை மாற்றப்போகும் அந்த 28% யுரேனியம்…. அமெரிக்கா, சீனாவுக்கு செக் வைத்த மோடியின் வரலாற்று ஒப்பந்தம்… கோகோஸ் தீவில் இந்தியா செய்யப்போகும் அதிரடி மாற்றம்…!

ஆஸ்திரேலியாவுக்கு அரசுமுறைப் பயணம் மேற்கொண்டுள்ள இந்தியப் பிரதமர் நரேந்திர மோடி, அந்நாட்டுப் பிரதமர் அந்தோணி அல்பானீஸை சந்தித்துப் பேசியுள்ளார். இந்த சந்திப்பில், இந்திய அணுசக்தித் துறையின் தலையெழுத்தையே மாற்றக்கூடிய வரலாற்றுச் சிறப்புமிக்க யுரேனியம் விநியோக ஒப்பந்தம் இறுதி செய்யப்பட்டு, அதிகாரப்பூர்வமாகக் கையெழுத்தாகியுள்ளது. உலகிலேயே மிக அதிக மக்கள் தொகை கொண்ட நாடான இந்தியாவின் மின்சாரத் தேவையைப் பூர்த்தி செய்யவும், மற்ற அணு ஆராய்ச்சிகளுக்குப் பயன்படுத்தவும் வகை செய்யும் விதமாக இந்த இருதரப்பு ஒப்பந்தம் மேற்கொள்ளப்பட்டுள்ளது.

உலகில் கண்டறியப்பட்ட ஒட்டுமொத்த யுரேனியம் வளத்தில் சுமார் 28 சதவீதம் ஆஸ்திரேலியாவில் உள்ளது. ஆச்சரியப்படும் விதமாக, ஆஸ்திரேலியா தனது நாட்டில் அணுமின் நிலையங்களையோ அல்லது அணு ஆயுதங்களையோ பயன்படுத்தாமல், தங்களது யுரேனியம் முழுவதையும் ஏற்றுமதி மட்டுமே செய்து வருகிறது. கடந்த பத்து ஆண்டுகளில் இந்தியா தனது அணுசக்தி உற்பத்தியை இருமடங்காக உயர்த்தியிருந்தாலும், நாட்டின் ஒட்டுமொத்த மின் உற்பத்தியில் அது வெறும் 3 சதவீதமாகவே உள்ளது. இந்நிலையில், வரும் 2047-ஆம் ஆண்டிற்குள் சுமார் 6 கோடி வீடுகளுக்கு மின்சாரம் வழங்கும் நோக்கில், 100 கிகாவாட் அணுமின் திறனை எட்ட இலக்கு நிர்ணயித்துள்ள இந்தியாவிற்கு இந்த ஒப்பந்தம் ஒரு பெரும் பக்கபலமாக அமையும்.

அணுஆயுதப் பரவல் தடைச் சட்டத்தில் கையெழுத்திடாத இந்தியா போன்ற நாடுகளுக்கு யுரேனியம் விற்க ஆஸ்திரேலியா நீண்ட காலமாக மறுத்து வந்தது. 1967 ஜனவரிக்கு முன்பாக அணு ஆயுதச் சோதனை நடத்திய அமெரிக்கா, சீனா உள்ளிட்ட ஐந்து நாடுகளை மட்டுமே இந்தச் சட்டம் அங்கீகரிப்பதால், இது ஒருதலைப்பட்சமானது என்று கூறி இந்தியா இதில் கையெழுத்திடவில்லை. இந்தியா 1974 மற்றும் 1998-ல் நடத்திய அணுசக்தி சோதனைகளால் சர்வதேசத் தடைகளை எதிர்கொண்டாலும், 2008-ல் அமெரிக்காவின் முயற்சியால் அணுசக்தி விநியோகக் கூட்டமைப்பு இந்தியாவுக்குச் சிறப்பு விலக்கு அளித்தது. ஆஸ்திரேலியாவுடன் கடந்த 2015-லேயே கொள்கை அளவிலான அணுசக்தி ஒப்பந்தம் போடப்பட்டாலும், பல்வேறு சட்ட சிக்கல்களால் முடங்கியிருந்த நிலையில், தற்போது இந்த புதிய ஒப்பந்தம் மூலம் அனைத்து பற்றாக்குறைகளும் நீங்கவுள்ளன.

இந்த வரலாற்று முக்கியத்துவம் வாய்ந்த ஒப்பந்தம் யுரேனியத்துடன் மட்டும் நின்றுவிடாமல், இரு நாடுகளின் ராணுவம் மற்றும் விண்வெளி ஆகிய துறைகளிலும் புதிய கூட்டணியை உருவாக்கியுள்ளது. இதன் ஒரு பகுதியாக, இந்தியப் பெருங்கடலில் உள்ள ஆஸ்திரேலியாவுக்குச் சொந்தமான ‘கோகோஸ் கீலிங்’ தீவுகளில் இந்தியாவின் விண்வெளிப் பயணங்களுக்குப் பயன்படுத்தும் விதமாக ஒரு தற்காலிக விண்வெளி கண்காணிப்பு முனையத்தை அமைக்க இரு நாடுகளும் ஒப்புக்கொண்டுள்ளன. இந்த மைல்கல் முடிவு, இந்தியாவின் ‘ககன்யான்’ போன்ற அதிநவீன எதிர்கால விண்வெளித் திட்டங்களுக்குப் பெரும் பலமாகவும், உலக அரங்கில் இந்தியாவின் நிலையை வலுப்படுத்துவதாகவும் அமையும் என்பதில் சந்தேகமில்லை.