ஜூன் 8-ஆம் தேதி டெல்லியில் நடைபெற உள்ள இந்தியா கூட்டணிக் கட்சிகளின் ஆலோசனைக் கூட்டத்தைப் புறக்கணிப்பதாக திமுக அதிகாரப்பூர்வமாக அறிவித்துள்ளது. நீட் தேர்வு, தொகுதி மறுசீரமைப்பு, ஒரே நாடு ஒரே தேர்தல் போன்ற ஜனநாயகத்திற்கும் மாநில உரிமைகளுக்கும் எதிரான பல பிரச்சினைகளுக்குத் தொடக்கம் முதலே முதன்மைக் குரலாக திமுக துணிச்சலுடன் நின்று போராடியுள்ளது. இந்தியா கூட்டணி தொடங்கிய காலம் முதல் அதன் மையச் சக்தியாகவும், அதன் தலைவர் மு.க.ஸ்டாலின் முக்கியப் பிரச்சினைகளில் முன்னின்று இயங்கியதாகவும் திமுக சுட்டிக்காட்டியுள்ளது.
தமிழ்நாட்டில் நடைபெற்ற சட்டமன்றப் பொதுத்தேர்தலுக்குப் பிறகு, காங்கிரஸ் கட்சி திமுகவிற்கு இழைத்த துரோகத்தின் காரணமாகக் கட்சித் தொண்டர்கள் மிகுந்த மனக்காயமடைந்துள்ளனர். அவர்களின் உணர்வுகளுக்கு மதிப்பளிக்கும் வகையில், காங்கிரஸ் கட்சி பங்கேற்கும் இந்த டெல்லி கூட்டத்தில் திமுக பங்கேற்காது என்று திட்டவட்டமாகத் தெரிவிக்கப்பட்டுள்ளது.
இந்த ஆலோசனைக் கூட்டத்தைப் புறக்கணித்தாலும், கூட்டணியில் இடம்பெற்றுள்ள பிற கட்சிகள் முன்வைக்கும் நாட்டு நலனைப் பாதிக்கும் பிரச்சினைகளுக்கு திமுக என்றென்றும் தொடர்ந்து ஆதரவளித்துக் குரல் கொடுக்கும் என்று அந்த அறிக்கையில் தெளிவுபடுத்தப்பட்டுள்ளது