சென்னையில் இன்றும் நாளையும் நடைபெறும் உலக மகளிர் உச்சி மாநாட்டை தமிழக முதலமைச்சர் மு.க. ஸ்டாலின் அவர்கள் தொடங்கி வைக்கிறார். உலகளாவிய அளவில் பெண்களின் முன்னேற்றம், தலைமைத்துவம் மற்றும் பொருளாதார சுதந்திரம் குறித்து விவாதிக்கப்படும் இந்த மாநாடு, தமிழக அரசின் மகளிர் நலத் திட்டங்களை உலகரங்கிற்கு பறைசாற்றும் ஒரு முக்கிய மேடையாக பார்க்கப்படுகிறது. இந்த மாநாட்டின் தொடக்க உரையில், தமிழக பெண்களின் வாழ்வாதாரத்தை மேம்படுத்தும் பல்வேறு புதிய முன்னெடுப்புகளை முதலமைச்சர் வெளியிடுவார் என்று எதிர்பார்க்கப்படுகிறது.
குறிப்பாக, தமிழக பெண்களின் பெரும் எதிர்பார்ப்பாக உள்ள கலைஞர் மகளிர் உரிமைத் தொகை உயர்வு குறித்த அதிகாரப்பூர்வ அறிவிப்பு இந்த மாநாட்டில் வெளியாகலாம் எனத் தகவல்கள் கசிகின்றன. ஏற்கனவே வழங்கப்பட்டு வரும் ரூ.1,000 உரிமைத் தொகையை உயர்த்தி வழங்குவதாக முதலமைச்சர் முன்பு குறிப்பிட்டிருந்த நிலையில், வரவிருக்கும் தேர்தலை முன்னிறுத்தி பெண்களின் ஆதரவை உறுதி செய்யும் வகையில் இந்த முக்கிய அறிவிப்பு அமையக்கூடும். பெண்களின் பொருளாதாரப் பங்களிப்பை அங்கீகரிக்கும் விதமாகவும், அவர்களின் வாக்குகளைக் கவரும் வகையிலும் திமுக தரப்பில் இதற்கான விரிவான திட்டங்கள் தயார் செய்யப்பட்டு வருவதாக அரசியல் வட்டாரங்கள் தெரிவிக்கின்றன.