“கையில் காசில்ல.. ஆனா EMI மட்டும் குறையல!”… 2026-ல் 6.6 கோடி இந்திய இளைஞர்களைத் துரத்தும் கடன்பேய்.. அதிரவைக்கும் ரிப்போர்ட்…!!!

இன்றைய இளம் தலைமுறையினர் சேமிப்பிற்குப் பதிலாக, கடன் வாங்கியாவது தங்கள் ஆசைகளை நிறைவேற்றிக் கொள்ள வேண்டும் என்ற நுகர்வோர் கலாச்சாரத்தில் வேகமாகச் சிக்கி வருகின்றனர். சி.ஆர்.ஐ.எப். ஹைமார்க் (CRIF High Mark) வெளியிட்டுள்ள ஆய்வறிக்கையின்படி, இந்தியாவில் கடன் வாங்குபவர்களில் 23 சதவீதம் பேர் 30 வயதிற்கும் குறைவான இளைஞர்கள் என்பது தெரியவந்துள்ளது. கடந்த 2021-ல் 4 கோடியாக இருந்த இவர்களின் எண்ணிக்கை, தற்போது 6.6 கோடியாக உயர்ந்துள்ளது. குறிப்பாக, 2025-ல் வழங்கப்பட்ட புதிய கடன்களில் பாதியளவு இளைஞர்களுக்கே சென்றுள்ளது, அவர்கள் சம்பாதிக்கும் முன்பே கடனாளிகளாக மாறும் போக்கை உறுதிப்படுத்துகிறது.

இளைஞர்கள் வாங்கும் கடன்களில் பெரும் பகுதி வீடு அல்லது சொத்து போன்ற எதிர்கால முதலீடுகளுக்காகப் பயன்படுத்தப்படுவதில்லை என்பதுதான் கவலைக்குரிய விஷயம். மாறாக, செல்போன்கள், லேப்டாப்கள் மற்றும் ஆடம்பரப் பொருட்கள் வாங்குவதற்காகவே 29.3 சதவீதம் பேர் தனிநபர் கடனையும், 15.5 சதவீதம் பேர் கிரெடிட் கார்டு கடனையும் நாடுகின்றனர். அடமானம் ஏதுமின்றி வழங்கப்படும் இத்தகைய கடன்களுக்கு வட்டி விகிதம் மிக அதிகம் என்பது தெரியாமலேயே, ஒரு கடனை அடைக்க மற்றொரு கடன் எனத் தொடர் கடன் வலையில் அவர்கள் வீழ்கின்றனர். ஒரு இளைஞரின் சராசரி கடன் தொகை தற்போது 2.7 லட்சமாக உள்ளது.

இத்தகைய முறையற்ற நிதி மேலாண்மை இளைஞர்களின் எதிர்காலத்தைப் பெரும் கேள்விக்குறியாக்கியுள்ளது. வாங்கிய கடனை உரிய நேரத்தில் திருப்பிச் செலுத்தாததால் அவர்களின் கிரெடிட் ஸ்கோர் (Credit Score) பாதிக்கப்படுகிறது; இதனால் பின்னாளில் தொழில் தொடங்கவோ அல்லது அவசரத் தேவைக்கோ வங்கி உதவி கிடைக்காமல் போகும் அபாயம் உள்ளது. மேலும், தவணை கட்ட முடியாமல் ஏற்படும் மன உளைச்சல் அவர்களின் நிம்மதியைப் பறிப்பதோடு, மீள முடியாத நிதி நெருக்கடியிலும் தள்ளிவிடுகிறது. முறையான நிதித் திட்டமிடல் இல்லாவிட்டால், இந்திய இளைஞர்களின் எதிர்காலம் வட்டி கட்டுவதிலேயே கழிந்துவிடும் எனச் சமூக ஆர்வலர்கள் எச்சரிக்கின்றனர்.