மகாராஷ்டிரா மாநிலம் நாசிக்கில் உள்ள ஒரு புகழ்பெற்ற தகவல் தொழில்நுட்ப (IT) நிறுவனத்தில் பணிபுரியும் பெண் ஊழியர்கள், தங்களது மேலதிகாரிகளால் பாலியல் ரீதியாகச் சுரண்டப்பட்ட விவகாரம் பெரும் அதிர்ச்சியை ஏற்படுத்தியுள்ளது. வேலை வாங்கித் தருவதாகக் கூறி பெண்களை வலையில் வீழ்த்தும் இந்த கும்பல், வேலை கிடைத்தவுடன் “எங்களுக்கு நீங்கள் நன்றிக்கடன் பட்டிருக்கிறீர்கள்” என்று கூறி பெண்களைப் பாலியல் வன்கொடுமைக்கு உள்ளாக்கியுள்ளனர். பாதிக்கப்பட்ட பெண் ஒருவரைச் சுற்றுலாத் தலத்திற்கு அழைத்துச் சென்று சீரழித்ததோடு, பணியிடங்களிலேயே ஆபாசமான சைகைகள் மற்றும் மத ரீதியான இழிவான கருத்துகளையும் இந்த மேலதிகாரிகள் தெரிவித்துள்ளனர்.
இந்த விசாரணையில் மேலும் பல திடுக்கிடும் தகவல்கள் வெளியாகியுள்ளன. பாலியல் அத்துமீறல்கள் ஒருபுறமிருக்க, அங்கு பணிபுரியும் இளம் ஊழியர் ஒருவரை மதம் மாறச் சொல்லி வற்புறுத்திய சம்பவமும் வெளிச்சத்திற்கு வந்துள்ளது. மேலும், ஒரு உயர் அதிகாரி தனக்குத் திருமணமாகியதை மறைத்து, ஒரு பெண்ணைத் திருமணம் செய்து கொள்வதாகப் பொய் கூறி திரிம்பக் சாலைப் பகுதியில் உள்ள விடுதி ஒன்றில் தொடர்ந்து பாலியல் ரீதியாகப் பயன்படுத்தியுள்ளார். அந்த நபரின் கூட்டாளியும் சேர்ந்து, அப்பெண்ணை மிரட்டி அலுவலகத்தின் சமையலறை மற்றும் வரவேற்பு அறையிலேயே பாலியல் தொல்லை கொடுத்து வந்துள்ளார்.
இந்த விவகாரத்தை மிகுந்த ரகசியத்துடன் கையாண்ட நகரக் காவல்துறை, தியோலாலி முகாம் மற்றும் மும்பை நாக்கா காவல் நிலையங்களில் கடந்த மார்ச் 25 முதல் ஏப்ரல் 3-ம் தேதி வரை மொத்தம் எட்டு வழக்குகளைப் பதிவு செய்துள்ளது. இந்த வழக்கில் இதுவரை ஆசிஃப் அன்சாரி, ஷஃபி ஷேக், ஷாருக்கான் குரேஷி, ரஸா மேமன் மற்றும் தௌசிஃப் அத்தார் ஆகிய ஐந்து பேரை போலீசார் கைது செய்துள்ளனர். வேலைக்கான நேர்காணல் நடைபெறும் நாளிலேயே பெண்களைக் குறிவைத்து இந்த மோசடி அரங்கேற்றப்பட்டதாகக் காவல்துறையினர் கண்டறிந்துள்ளனர்.
கைது செய்யப்பட்ட ஐந்து நபர்களையும் ஏப்ரல் 10-ம் தேதி வரை போலீஸ் காவலில் வைக்க நீதிமன்றம் உத்தரவிட்டுள்ளது. இந்தச் சங்கிலித் தொடர் மோசடியில் இன்னும் எத்தனை பேருக்குத் தொடர்புள்ளது, பாதிக்கப்பட்ட பெண்களின் மொத்த எண்ணிக்கை எவ்வளவு என்பது குறித்து மும்பை நாக்கா காவல்துறையினர் தீவிரமாக விசாரணை நடத்தி வருகின்றனர். ஏற்கனவே ஜோதிடர் என்ற பெயரில் பெண்களைச் சுரண்டிய அசோக் கராத் விவகாரம் ஓய்வதற்குள், கார்ப்பரேட் துறையில் நடந்துள்ள இந்தச் சம்பவம் நாசிக் மக்களிடையே பெரும் கொந்தளிப்பை ஏற்படுத்தியுள்ளது.