“கையில் மல்லிகைப் பூ.. கெத்தான நடை.. ‘நானும் மதுரைக்காரன் தான்!’… தேர்தல் களத்தில் அதிரடி காட்டிய பிடிஆர்”…!!

மதுரை மத்திய தொகுதியில் மூன்றாவது முறையாக திமுக சார்பில் போட்டியிடும் அமைச்சர் பழனிவேல் தியாகராஜன், தொகுதிக்கு உட்பட்ட பல்வேறு வாக்குப்பதிவு மையங்களுக்கு நேரில் சென்று ஆய்வு மேற்கொண்டார். தத்தனேரி பகுதியில் உள்ள தனியார் பள்ளியில் அமைக்கப்பட்டிருந்த வாக்குச்சாவடியில், பூத் ஏஜென்ட்கள் மற்றும் வாக்காளர்களைச் சந்தித்த பின் செய்தியாளர்களிடம் பேசினார். அப்போது, கடந்த ஐந்து ஆண்டு கால திமுக ஆட்சி சிறப்பாக அமைந்திருந்ததாகவும், ‘திராவிட மாடல் 2.0’ திட்டத்தின் கீழ் அடுத்த ஐந்து ஆண்டுகளையும் செம்மையாக முன்னெடுத்துச் செல்ல மக்கள் சிந்தித்து வாக்களிக்க வேண்டும் என்றும் அவர் கேட்டுக்கொண்டார்.

தமிழகத்தைத் தவறான பாதையில் வழிநடத்திய அரசை அகற்ற வேண்டிய மகத்தான பணி இன்னும் பாக்கி இருப்பதாகக் குறிப்பிட்ட அவர், அதிமுகவை மறைமுகமாக விமர்சித்தார். தற்போதைய தேர்தல் களம் குறித்துப் பேசிய பழனிவேல் தியாகராஜன், வெளியூரில் இருந்து வந்தவர்களும், ஏற்கனவே குற்றச் சம்பவங்களில் ஈடுபட்டவர்களும் தேர்தல் களத்தைக் கலங்கப்படுத்த முயற்சிப்பதாகக் குற்றம் சாட்டினார். இருப்பினும், இம்முறை அவர்கள் வந்தாலும் அடுத்த முறை காணாமல் போய்விடுவார்கள் என்றும், தாங்கள் அனைவரும் மிகுந்த ஒற்றுமையுடன் செயல்பட்டு வருவதாகவும் அவர் உறுதிபடத் தெரிவித்தார்.

பேட்டியின் போது கைகளில் மல்லிகைப்பூவைச் சுற்றியபடி உற்சாகமாகக் காணப்பட்ட அவரிடம், அது குறித்து செய்தியாளர்கள் கேள்வி எழுப்பினர். அதற்குப் பதிலளித்த அவர், “நானும் மதுரைக்காரன் தான்” என்று சிரித்தபடியே கூறி, மல்லிகைப்பூ அணிந்த கைகளுடன் போஸ் கொடுத்தது அங்கிருந்தோரிடையே கலகலப்பை ஏற்படுத்தியது. தேர்தலின் பரபரப்பான சூழலிலும் மதுரையின் அடையாளமான மல்லிகைப்பூவை அணிந்து, தனது மண்ணின் மீதான பற்றையும் உற்சாகத்தையும் வெளிப்படுத்திய அவரது பாணி சமூக வலைதளங்களில் கவனம் பெற்று வருகிறது.