“ஐ லவ் யூ”…. சாக்லேட் கொடுத்து மாணவியிடம் ப்ரொபோஸ் செய்த பேராசிரியர்… விரட்டி விரட்டி வெளுத்தெடுத்த மாணவர்கள்… போர்க்களமான கல்லூரி…!!

பெங்களூரு அருகே நிலமங்கலாவில் உள்ள ஒரு தனியார் மருத்துவக் கல்லூரியில், 50 வயது மதிக்கத்தக்க மைக்ரோபயாலஜி உதவிப் பேராசிரியர் அப்துல் ரெஹ்மான் ஷெரீப் என்பவர், வகுப்பறையில் பாடம் நடத்திக் கொண்டிருந்தபோது 19 வயது மாணவிக்குத் திடீரென “ஐ லவ் யூ” கூறி காதலைத் தெரிவித்துள்ளார். மேலும் சில சாக்லேட்களை மாணவிக்கு வழங்கியதாகவும் கூறப்படுகிறது. மாணவி இதற்கு கடும் எதிர்ப்பு தெரிவித்து மறுப்பு தெரிவித்தும், அந்தப் பேராசிரியர் விடாமல் “நீதான் என்னைக் காதலிப்பதாக முன்பு கூறினாய், சிசிடிவி காட்சிகளே அதற்குச் சாட்சி” என வாதிட்டுள்ளார்.

பேராசிரியரின் இந்த அநாகரீகச் செயலால் ஆத்திரமடைந்த அந்த மாணவி, வகுப்பறையிலேயே அவருடன் வாக்குவாதத்தில் ஈடுபட்டார். பேராசிரியர் அங்கிருந்து வெளியேற முயன்றபோது, கல்லூரி வளாகத்தில் சக மாணவர்கள் அவரைச் சூழ்ந்துகொண்டு கேள்வி எழுப்பினர். அப்போது ஆவேசமடைந்த மாணவி, தனது காலணியைக் கழற்றி பேராசிரியரைத் தாக்கினார். அங்கிருந்த மற்ற மாணவர்களும் ஒன்று சேர்ந்து அந்தப் பேராசிரியரை விரட்டி விரட்டித் தாக்கியதால் அந்த இடமே போர்க்களமாக மாறியது.

இந்தச் சம்பவம் தொடர்பான வீடியோ சமூக வலைதளங்களில் வெளியாகி பெரும் பரபரப்பை ஏற்படுத்திய நிலையில், கல்லூரி நிர்வாகம் சம்பந்தப்பட்ட பேராசிரியரைப் பணியிடை நீக்கம் செய்துள்ளது. இது குறித்து வழக்குப் பதிவு செய்து விசாரணை நடத்தத் தயாராக இருப்பதாகக் காவல்துறை தெரிவித்துள்ள போதிலும், பாதிக்கப்பட்ட மாணவி தரப்பில் இதுவரை முறையான புகார் எதுவும் அளிக்கப்படவில்லை என்று கூறப்படுகிறது.