தமிழக அரசியலில் சசிகலா மற்றும் மருத்துவர் ராமதாஸ் இடையிலான புதிய கூட்டணி, பாமகவின் உள்வட்டாரங்களில் பெரும் அதிர்வலைகளை ஏற்படுத்தியுள்ளது. குறிப்பாக, சசிகலாவுடன் கைகோர்த்த முடிவை பாமகவின் இரண்டாம் கட்டத் தலைவர்களும் தொண்டர்களும் முழுமையாக ஏற்கவில்லை எனக் கூறப்படுகிறது. இந்த அதிருப்தியைச் சரிசெய்யவும், தேர்தல் வியூகத்தை வகுக்கவும் தைலாபுரம் தோட்டத்தில் வேட்பாளர் நேர்காணலை ராமதாஸ் நடத்தினார். ஆனால், “தேர்தல் செலவு செய்யப் பணம் இல்லை, சீட் வேண்டாம்” என முக்கிய நிர்வாகிகள் பின்வாங்கியது ராமதாஸை மிகுந்த அதிர்ச்சியில் ஆழ்த்தியுள்ளது.
ஜி.கே. மணி மற்றும் அருள் போன்ற சிட்டிங் எம்.எல்.ஏ.க்களே மீண்டும் போட்டியிட ஆர்வம் காட்டாதது கட்சியின் தலைமைக்குத் தர்மசங்கடத்தை உருவாக்கியுள்ளது. சசிகலாவுடனான கூட்டணியால் அதிருப்தியடைந்த நிர்வாகிகள் பலர், மீண்டும் அன்புமணி ராமதாஸ் தரப்பிடமே தஞ்சம் அடையலாமா என ஆலோசித்து வருவதாகத் தெரிகிறது. கட்சியின் எதிர்காலம் மற்றும் தங்களின் அரசியல் வாழ்வு குறித்து மூத்த நிர்வாகிகள் ரகசிய ஆலோசனையில் ஈடுபட்டு வருவது பாமகவிற்குள் நிலவும் விரிசலை வெளிச்சம் போட்டுக் காட்டுகிறது.
மறுபுறம், தேர்தல் செலவுகள் குறித்து ராமதாஸ் கவலை தெரிவித்தபோது, “அனைத்தையும் நான் பார்த்துக்கொள்கிறேன்” என சசிகலா உறுதி அளித்துள்ளதாகத் தகவல்கள் தெரிவிக்கின்றன. இடப் பங்கீட்டைப் பொறுத்தவரை, பாமக 134 தொகுதிகளிலும், சசிகலாவின் அஇபுதமமுக 100 தொகுதிகளிலும் போட்டியிடத் திட்டமிட்டுள்ளனர். இருப்பினும், தென் மாவட்டங்களில் பாமகவிற்கும், வட மாவட்டங்களில் சசிகலா தரப்பிற்கும் போதிய வேட்பாளர்கள் இல்லாதது பெரும் சவாலாக உருவெடுத்துள்ளது.
இந்த வேட்பாளர் பஞ்சத்தைப் போக்க இரு தரப்பும் ஒரு ‘வித்தியாசமான டீலிங்’ ஒன்றை மேற்கொண்டுள்ளன. அதன்படி, ஒரு கட்சிக்கு வேட்பாளர்கள் இல்லாத பகுதிகளில் மற்ற கட்சியின் நபர்களைத் தங்கள் சின்னத்தில் நிறுத்துவது என முடிவு செய்யப்பட்டுள்ளது. “துரோகிகளை வீழ்த்த வேண்டும்” என்ற ஒற்றை நோக்கில் இந்தக் கூட்டணி அமைந்திருந்தாலும், சொந்தக் கட்சியினரின் தயக்கமும் வேட்பாளர் தட்டுப்பாடும் இந்தக் கூட்டணியின் வெற்றியைத் தீர்மானிக்கும் முக்கிய காரணிகளாக அமையப்போகின்றன.