ஹைதராபாத்தில் உள்ள அம்பர்பேட்டை, திருமல் நகர் பகுதியைச் சேர்ந்தவர் நிபாஷ். ஆயுதப்படை காவலராகப் பணியாற்றி வந்த இவர், தனது வீட்டில் திடீரென தூக்கிட்டுத் தற்கொலை செய்துகொண்டார். காதல் விவகாரத்தில் ஏற்பட்ட தோல்வி காரணமாகவே மனமுடைந்து அவர் இந்த விபரீத முடிவை எடுத்திருக்கலாம் என முதற்கட்ட தகவல்கள் தெரிவிக்கின்றன.
தற்கொலை செய்துகொள்வதற்குச் சற்று முன்பு, நிபாஷ் தனது முடிவை வாட்ஸ்அப் வாயிலாக நண்பர்களுக்கு குறுஞ்செய்தியாகத் தெரிவித்துள்ளார். இதைப் பார்த்து அதிர்ச்சியடைந்த அவர்கள் உடனடியாகக் காவல்துறைக்குத் தகவல் அளித்தனர். சம்பவ இடத்திற்கு விரைந்து வந்த போலீசார், இதுதொடர்பான விவரங்களைச் சேகரித்து உடலைக் கைப்பற்றினர். தற்போது, உயிரிழந்த காவலரின் குடும்பத்தினர் அளித்த புகாரின் பேரில் வழக்குப்பதிவு செய்து, தற்கொலைக்கான உண்மையான காரணம் குறித்து தீவிர விசாரணை மேற்கொண்டு வருகின்றனர்.