சாதி மறுப்பு திருமணம்.. “கணவனுடன் தான் போவேன்” அடம்பிடித்த மகள்… காவல் நிலையத்திற்குள்ளேயே குத்திக்கொன்ற தந்தை… பதறவைக்கும் சம்பவம்..!!

உத்தரப் பிரதேச மாநிலம் பண்டா மாவட்டத்தில், சாதி மறுப்புத் திருமணம் செய்துகொண்ட 19 வயது இளம் பெண் ஒருவர், காவல் நிலையத்திற்குள்ளேயே தந்தையால் கத்தியால் குத்திக் கொல்லப்பட்ட அதிர்ச்சிச் சம்பவம் பெரும் பரபரப்பை ஏற்படுத்தியுள்ளது. படோசா காவல் நிலையத்தில் இருதரப்பினரையும் அழைத்து போலீஸார் சமரசப் பேச்சுவார்த்தை நடத்திக் கொண்டிருந்தனர். அப்போது, தனது பெற்றோருடன் செல்ல மறுத்த அந்தப் பெண், தன் காதலித்துத் திருமணம் செய்துகொண்ட கணவருடன்தான் வாழ்வேன் என்பதில் உறுதியாக இருந்துள்ளார். மகளின் இந்த முடிவால் கடுமையான ஆத்திரமடைந்த தந்தை, எதிர்பாராத விதமாகத் தான் மறைத்து வைத்திருந்த கத்தியை எடுத்து காவல் நிலைய வளாகத்திற்குள்ளேயே மகளைக் கொடூரமாகக் குத்தியுள்ளார்.

கத்திக் குத்தில் பலத்த காயமடைந்த அந்தப் பெண் உடனடியாக மீட்கப்பட்டு மருத்துவமனைக்குக் கொண்டு செல்லப்பட்டார். எனினும், அங்கு சிகிச்சை பலனின்றி அவர் பரிதாபமாக உயிரிழந்தார். இந்தத் துயரச் சம்பவம் தொடர்பாக உயிரிழந்த பெண்ணின் தாயாரே காவல் நிலையத்தில் புகார் அளித்துள்ளார். தாயார் கொடுத்த புகாரின் அடிப்படையில், சொந்த மகளையே காவல் நிலையத்திற்குள் வைத்து ஆணவக் கொலை செய்த கொடூரத் தந்தையைக் காவல் துறையினர் அதிரடியாகக் கைது செய்து தீவிர விசாரணை மேற்கொண்டு வருகின்றனர்.