“தம்பி மனைவியுடன் கள்ளக்காதல்.. மனைவியை கழிவறையில் பூட்டி வைத்து சித்திரவதை செய்த கணவன்… தூக்கில் முடிந்த அந்தப் போராட்டம்… அதிர்ச்சியில் உறவினர்கள்”….!!!

திருவள்ளூர் மாவட்டம் ஜவகர் நகரைச் சேர்ந்த சுனில் குமார் என்பவருக்கும், லாவண்யா என்பவருக்கும் இடையே ஏற்பட்ட குடும்பத் தகராறு ஒரு உயிரைப் பறித்த சோகமான சம்பவம் அரங்கேறியுள்ளது. நான்கு ஆண்டுகளுக்கு முன் திருமணமான இவர்களுக்கு 10 மாத ஆண் குழந்தை ஒன்று உள்ளது. கருத்து வேறுபாடு காரணமாக லாவண்யா கடந்த இரண்டு வாரங்களாகப் பெருமாள் செட்டி தெருவில் உள்ள தனது தாய் வீட்டில் தங்கியிருந்தார். இந்நிலையில், கடந்த 26-ம் தேதி இரவு லாவண்யாவைப் பார்க்கச் சென்ற சுனில் குமார், அவரை வீட்டிற்கு வருமாறு அழைத்ததோடு குழந்தையைத் தன்னுடன் அனுப்பக் கோரி கடும் வாக்குவாதத்தில் ஈடுபட்டுள்ளார். ஒருகட்டத்தில் லாவண்யாவின் கையிலிருந்த குழந்தையை அவர் பிடுங்க முயன்றதால் மனமுடைந்த லாவண்யா, கணவர் வாசலில் இருக்கும்போதே வீட்டிற்குள் சென்று தூக்கிட்டுத் தற்கொலை செய்துகொண்டார்.

இந்தச் சம்பவம் தற்கொலை அல்ல, ஒரு திட்டமிட்ட கொலை என்று லாவண்யாவின் தாய் அமுதா பரபரப்பு புகாரைக் கிளப்பியுள்ளார். தனது மருமகன் சுனில் குமார், அவரது தம்பியின் மனைவியுடன் திருமணத்திற்கு மீறிய உறவில் இருந்ததாகவும், இதைத் தட்டிக்கேட்ட லாவண்யாவைக் கழிவறையில் பூட்டி வைத்து அடித்துத் துன்புறுத்தியதாகவும் அவர் குற்றம் சாட்டியுள்ளார். மேலும், கூடுதல் நகை மற்றும் பணம் கேட்டு லாவண்யாவை அவரது கணவர் வீட்டார் தொடர்ந்து சித்திரவதை செய்துள்ளனர். “என் தம்பியின் மனைவியுடன் உறவில் இருக்கிறேன், உங்களால் என்ன செய்ய முடியும்?” என்று சுனில் குமார் திமிராகப் பேசியதாகவும், லாவண்யாவின் மரணத்திற்குச் சுனில் குமார், அவரது தாய் மற்றும் தம்பி ஆகியோரே காரணம் என்றும் அவர் செய்தியாளர்களிடம் கண்ணீருடன் தெரிவித்துள்ளார்.

லாவண்யாவின் மரணத்திற்கு நீதி கோரியும், சுனில் குமார் உள்ளிட்ட அவரது குடும்பத்தினர் மீது உடனடியாக வழக்குப் பதிவு செய்து கைது செய்ய வலியுறுத்தியும் லாவண்யாவின் உறவினர்கள் திருவள்ளூரில் சாலை மறியலில் ஈடுபட்டனர். இதனால் அப்பகுதியில் பெரும் போக்குவரத்து நெரிசல் ஏற்பட்டது. பத்து மாதக் குழந்தையைத் தவிக்கவிட்டுத் தாய் உயிரிழந்த சம்பவம் அப்பகுதி மக்களிடையே பெரும் சோகத்தை ஏற்படுத்தியுள்ள நிலையில், போலீஸார் உரிய நடவடிக்கை எடுப்பதாக அளித்த வாக்குறுதியின் பேரில் மறியல் கைவிடப்பட்டது. தற்போது திருவள்ளூர் நகர போலீஸார் இது தொடர்பாக வழக்குப் பதிவு செய்து, வரதட்சணை கொடுமை மற்றும் தற்கொலைக்குத் தூண்டுதல் உள்ளிட்ட பல்வேறு கோணங்களில் தீவிர விசாரணை நடத்தி வருகின்றனர்.