விடிய விடிய சண்டை.. காலையில் மனைவியின் கழுத்தை அறுத்த கணவன்… தாயின் ரத்த வெள்ள சடலம் அருகில் தூங்கிய 7 வயது குழந்தை… 20 கிமீ ஓடி மெட்ரோ ரயிலில் பாய்ந்த திக் திக் நிமிடங்கள்…!

மேற்கு வங்காள மாநிலம் ஹூக்ளி மாவட்டம் ரிஷ்ரா பகுதியைச் சேர்ந்த தனியார் நிறுவன ஊழியர் தீபங்கர் சர்க்கார் (39), அவரது மனைவி மொனிகா சர்க்கார் (31) ஆகிய இருவருக்கு இடையே ஏற்பட்ட குடும்பத் தகராறு, ஒட்டுமொத்த கொல்கத்தாவையே உலுக்கும் ஒரு பெரும் துயரத்தில் முடிந்துள்ளது. ஆரம்பத்தில் மகிழ்ச்சியாகச் சென்ற இவர்களது குடும்ப வாழ்க்கையில், சமீபகாலமாக அடிக்கடி மோதல்கள் வெடித்துள்ளன. இந்த நிலையில், கடந்த வெள்ளிக்கிழமை இரவு இருவருக்கும் இடையே விடிய விடிய நீடித்த கடுமையான வாக்குவாதம், சனிக்கிழமை அதிகாலையில் கொடூரக் கொலையாக மாறியுள்ளது. ஆத்திரத்தின் உச்சிக்கே சென்ற தீபங்கர், கத்தியால் தன் மனைவியின் கழுத்தை அறுத்துக் கொடூரமாகக் கொலை செய்துள்ளார்.

இந்த கொடூரச் சம்பவத்தின் உச்சகட்ட சோகமாக, சனிக்கிழமை காலை வீட்டிற்கு வந்த வேலைக்காரி கதவைத் திறந்து பார்த்தபோது, ரத்த வெள்ளத்தில் சடலமாகக் கிடந்த தாயின் அருகிலேயே எதுவுமே அறியாமல் அவர்களது 7 வயதுக் குழந்தை தூங்கிக் கொண்டிருந்துள்ளது. வேலைக்காரியின் அலறல் சத்தம் கேட்டு ஓடிவந்த அக்கம் பக்கத்தினர் உடனடியாக போலீசாருக்குத் தகவல் கொடுத்தனர். சம்பவ இடத்திற்கு விரைந்து வந்த ரிஷ்ரா போலீசார், அந்தப் பிஞ்சு குழந்தையை மீட்டு அவளது பாட்டி வீட்டில் பாதுகாப்பாக ஒப்படைத்ததுடன், தலைமறைவாக இருந்த கணவர் தீபங்கர் சர்க்காரைத் தேடும் பணியையும் தீவிரப்படுத்தினர்.

மனைவியைக் கொலை செய்துவிட்டு வீட்டை விட்டு ஓடிய தீபங்கர் சர்க்கார், ரிஷ்ராவிலிருந்து சுமார் 20 கிலோமீட்டர் தொலைவில் உள்ள கொல்கத்தா நகரத்திற்குச் சென்றுள்ளார். கடுமையான மன உளைச்சலில் சுற்றிய அவர், அன்று மதியம் 3 மணியளவில் கொல்கத்தாவின் பெல்காச்சியா மெட்ரோ ரயில் நிலையத்திற்குள் நுழைந்து, வேகமாக வந்த மெட்ரோ ரயிலின் முன்பாக திடீரென பாய்ந்து தற்கொலை செய்துகொண்டார். இந்த விபரீத முடிவால் கொல்கத்தா மெட்ரோவின் ‘புளூ லைன்’ ரயில் சேவைகள் சுமார் 50 நிமிடங்கள் ஸ்தம்பித்தன. இதையடுத்து உடலை மீட்ட உல்டாடாங்கா பகுதி போலீசார் நடத்திய விசாரணையில், அவர்தான் ரிஷ்ராவில் மனைவியைக் கொலை செய்துவிட்டுத் தேடப்பட்டு வந்த தீபங்கர் என்பது உறுதி செய்யப்பட்டது.

இச்சம்பவம் குறித்து பாரதிய நியாய சன்ஹிதா சட்டப்பிரிவுகளின் கீழ் வழக்குப் பதிவு செய்துள்ள போலீசார், இதன் பின்னணியில் உள்ள காரணங்கள் குறித்து தீவிர விசாரணை நடத்தி வருகின்றனர். தீபங்கருக்கு வேறொரு பெண்ணுடன் இருந்த தவறான உறவை மொனிகா கண்டித்ததால் இந்த சண்டை மூண்டதாக அக்கம் பக்கத்தினர் கூறும் வேளையில், மொனிகாவின் நடத்தையின் மீது தீபங்கருக்கு இருந்த சந்தேகமே கொலைக்குக் காரணம் என மொனிகாவின் உறவினர்கள் குற்றம் சாட்டுகின்றனர். இவ்வாறு இருதரப்பும் மாறிமாறிப் புகார் தெரிவிப்பதால், இந்த விவகாரத்தில் மூன்றாவதாக ஒரு நபருக்குத் தொடர்பு இருக்கலாம் என்ற கோணத்திலும் முழுமையாக விசாரித்து வருவதாக ஸ்ரீராம்பூர் காவல்துறை துணை ஆணையர் அர்னாப் பிஸ்வாஸ் தெரிவித்துள்ளார்.