சென்னை மாதவரம் பொன்னியம்மன் மேடு பகுதியைச் சேர்ந்த 39 வயதான கலிமுல்லா, தனியார் நிறுவனம் ஒன்றில் விற்பனைப் பிரதிநிதியாக (Sales Executive) பணியாற்றி வருகிறார். திருமணமான இவருக்கு இரண்டு குழந்தைகள் உள்ளனர். இந்நிலையில், கலிமுல்லாவிற்கு அவர் பணிபுரியும் அதே நிறுவனத்தில் வேலை செய்யும் நிஷா (பெயர் மாற்றப்பட்டுள்ளது) என்ற பெண்ணுடன் பழக்கம் ஏற்பட்டுள்ளது. இந்த நட்பு நாளடைவில் நெருக்கமாக மாறவே, கடந்த எட்டு மாதங்களாக இருவரும் அடிக்கடி பேசிப் பழகி வந்ததாகக் கூறப்படுகிறது.
நிஷாவின் நடத்தையில் ஏற்பட்ட மாற்றத்தைக் கண்டு சந்தேகமடைந்த அவரது கணவர் ஹேமந்த் குமார், தனது மனைவியைத் தொடர்ந்து கண்காணித்து வந்துள்ளார். அப்போது நிஷா, தன்னுடன் வேலை பார்க்கும் கலிமுல்லாவுடன் ரகசியமாகத் தொடர்பில் இருப்பதை அறிந்து அதிர்ச்சியடைந்தார். இதனால் ஆத்திரமடைந்த ஹேமந்த் குமார், கலிமுல்லாவை நேரில் வரவழைத்துக் கண்டிக்கத் திட்டமிட்டு, தனது நண்பர்களுடன் சேர்ந்து ஒரு சதித்திட்டத்தைத் தீட்டினார்.
திட்டமிட்டபடி, கடந்த ஏப்ரல் 22-ஆம் தேதி கலை என்ற நபர் மூலமாக கலிமுல்லாவைத் தொடர்பு கொண்டு, பேச வேண்டும் என ஓட்டேரி தாச மகான் பகுதிக்கு வரவழைத்துள்ளனர். அங்கு சென்ற கலிமுல்லாவை மடக்கிய ஹேமந்த் குமார், “என் மனைவியுடன் பேச உனக்கு எவ்வளவு தைரியம்?” எனக் கேட்டு வாக்குவாதத்தில் ஈடுபட்டுள்ளார். பின்னர் தனது நண்பர்கள் இருவருடன் சேர்ந்து, கலிமுல்லாவை ஒரு வீட்டின் மொட்டை மாடிக்கு அழைத்துச் சென்று சரமாரியாகத் தாக்கியதுடன், கத்தியால் குத்தி கொலை மிரட்டலும் விடுத்துள்ளனர்.
இந்தத் தாக்குதலில் பலத்த காயமடைந்த கலிமுல்லா, தப்பிச் சென்று பெரியார் நகர் அரசு மருத்துவமனையில் சிகிச்சைக்காக அனுமதிக்கப்பட்டார். இது குறித்து அவர் அளித்த புகாரின் பேரில் வழக்குப் பதிவு செய்த ஓட்டேரி காவல்துறையினர் தீவிர விசாரணை நடத்தினர். அதில் ஹேமந்த் குமார் தனது நண்பர்களான கலையரசன் மற்றும் ஹரிகிருஷ்ணனுடன் சேர்ந்து இத்தாக்குதலில் ஈடுபட்டது உறுதியானது. இதனைத் தொடர்ந்து தலைமறைவாக இருந்த மூன்று பேரையும் கைது செய்த போலீசார், அவர்களை நீதிமன்றத்தில் ஆஜர்படுத்தி சிறையில் அடைத்தனர்.