பீகார் மாநிலத்தில் பாம்பு பிடிக்கும் தொழிலாளி ஒருவர், தன்னை கடித்த பாம்பை அடையாளம் காட்டுவதற்காக மூன்று கொடிய விஷமுள்ள நாகப்பாம்புகளுடன் அரசு மருத்துவமனைக்கு வந்த சம்பவம் பெரும் பரபரப்பை ஏற்படுத்தியுள்ளது. ரோஹ்தாஸ் மாவட்டத்தைச் சேர்ந்த கவுதம் குமார் என்பவர், ஒரு வீட்டில் புகுந்த மூன்று நாகப்பாம்புகளைப் பிடித்தபோது, எதிர்பாராதவிதமாக அவற்றில் ஒரு பாம்பு அவரது கையை கடித்தது. தம்மைக் கடித்தது எந்தப் பாம்பு என்பதில் குழப்பம் ஏற்பட்டதால், அவர் அந்த மூன்று பாம்புகளையும் ஒரே பையில் போட்டுக்கொண்டு சாசாராம் பகுதியில் உள்ள அரசு மருத்துவமனைக்கு விரைந்தார்.
மருத்துவமனைக்கு வந்த கவுதம் குமார், சிகிச்சையின் போது தமக்கு ஏற்பட்ட குழப்பத்தை விளக்கி, பையில் இருந்த 8 முதல் 10 அடி நீளமுள்ள மூன்று நாகப்பாம்புகளையும் மருத்துவர்களிடம் வெளியே எடுத்துக் காட்டினார். ஆக்ரோஷமாகச் சீறிய பாம்புகளைக் கண்ட மருத்துவர்கள், ஊழியர்கள் மற்றும் அங்கிருந்த நோயாளிகள் அச்சத்தில் அலறியடித்துக் கொண்டு நாலாபுறமும் சிதறி ஓடினர். இதனால் மருத்துவமனை வளாகமே போர்க்களம் போல காட்சியளித்ததுடன், சிறிது நேரம் அங்கு பெரும் பதற்றம் நிலவியது.
தகவலறிந்து விரைந்து வந்த வனத்துறையினர் அந்த மூன்று நாகப்பாம்புகளையும் பாதுகாப்பாக மீட்டுச் சென்றனர். அதன்பின்னர் கவுதம் குமாருக்கு மருத்துவர்கள் தீவிர சிகிச்சை அளித்து அவரது உயிரைக் காப்பாற்றினர். பாம்பு கடித்தால் அந்தப் பாம்பை நேரில் கொண்டு வரத் தேவையில்லை என்றும், அதன் புகைப்படம் அல்லது அடையாளத்தைச் சொன்னாலே போதுமானது என்றும் அறிவுரை வழங்கிய மருத்துவர்கள், இது போன்ற செயல்கள் மற்றவர்களின் உயிருக்கும் ஆபத்தை விளைவிக்கும் என எச்சரித்து அவரை அனுப்பி வைத்தனர்.