வீடு தேடி வரும் ரேஷன் பொருட்கள்…! விண்ணப்பிப்பது எப்படி…? வெளியான முக்கிய தகவல்…!!

தமிழ்நாடு அரசு செயல்படுத்தி வரும் தாயுமானவர் திட்டத்தின் மூலம் மாதம் தோறும் இரண்டாவது சனிக்கிழமை மற்றும் ஞாயிற்றுக்கிழமை மூத்த குடிமக்கள் மாற்றுத்திறனாளிகள் உள்ளிட்டோருக்கு வீடு தேடி ரேஷன் பொருட்கள் விநியோகம் செய்யப்படுகிறது. அந்த நாட்களில் ரேஷன் பொருட்கள் விநியோகம் செய்ய முடியவில்லை என்றால் மாவட்ட ஆட்சியர், பொது விநியோக திட்ட அதிகாரிகள் உள்ளிட்டோர் முடிவு செய்யும் தேதிகளில் ரேஷன் பொருட்கள் வீடு தேடி விநியோகம் செய்யப்படும்.

நாகப்பட்டினம் மாவட்டத்தில் முதலமைச்சரின் தாயுமானவர் திட்டத்தின் மூலம் அக்டோபர் மாதம் 5-ஆம் தேதி ஞாயிற்றுக்கிழமை, 6-ம் தேதி திங்கட்கிழமை, 7-ஆம் தேதி செவ்வாய்க்கிழமை ஆகிய தேதிகளில் 70க்கும் மேற்பட்டோர் மற்றும் மாற்றுத்திறனாளி குடும்ப அட்டைதாரர்களின் வீடுகளுக்கு சென்று பொருட்கள் விநியோகம் செய்யப்பட உள்ளது.

எனவே தகுதியுடைய குடும்ப அட்டைதாரர்கள் தாயுமானவர் திட்டத்தினை பயன்படுத்தி பயனடையுமாறு மாவட்ட ஆட்சியர் கூறியுள்ளார். இந்த திட்டத்தின் மூலம் எல்லோருக்கும் ரேஷன் பொருட்கள் வீடு தேடி விநியோகம் செய்யப்படாது. 70 வயதுக்கு மேற்பட்டவர்கள் மாற்றுத்திறனாளிகளின் வீடுகளுக்கு மட்டுமே ரேஷன் பொருட்கள் வீடு தேடி விநியோகம் செய்யப்படும்.

தகுதியுடைய நபர்கள் உங்களுடன் ஸ்டாலின் முகாம், பொது விநியோகத் திட்ட குறைதீர் முகாம் ஆகியவற்றில் நேரடியாக சென்று விண்ணப்பிக்கலாம். இந்த திட்டத்தின் மூலம் வீடு தேடி வரும் பொருட்களை வாங்க முடியவில்லை என்றால் அந்த குடும்பத்தைச் சேர்ந்த பிற நபர்கள் யாராவது அடுத்த நாள் ரேஷன் கடைக்கு சென்று அந்த பொருட்களை வாங்கிக் கொள்ளலாம். முன்னதாக முதியவர்களுக்காக வாங்குகிறேன் என பிரதிநிதி படிவத்தை நிரப்பி கொடுக்க வேண்டும்.