“கிளைமாக்ஸ் காட்சியை மிஞ்சிய பரபரப்பு!.. துப்பாக்கி ஏந்திய கடத்தல்காரர்களை போலீஸ் வளைத்துப் பிடித்தது எப்படி?… நெடுஞ்சாலையில் சினிமா பாணி சேஸிங்… வைரலாகும் திகில் வீடியோ”…!!!

ராஜஸ்தான் மாநிலம் ஸ்ரீகங்கானகர் மாவட்ட காவல்துறையினர், சர்வதேச போதைப்பொருள் மற்றும் ஆயுதக் கடத்தல் கும்பலுக்கு எதிராக அதிரடி நடவடிக்கை மேற்கொண்டுள்ளனர். பாரத் மாலா நெடுஞ்சாலையில் நடத்தப்பட்ட இந்த சோதனையின்போது, பஞ்சாபின் ஃபாசில்கா மாவட்டத்தைச் சேர்ந்த குல்விந்தர் சிங் மற்றும் ராபின் சிங் ஆகிய இருவர் கைது செய்யப்பட்டனர். காவல்துறையினரின் தடுப்புகளை மீறி அதிவேகமாகத் தப்பிச் செல்ல முயன்ற இவர்களின் கார் விபத்துக்குள்ளான நிலையில், உள்ளூர் மக்களின் உதவியுடன் இருவரும் மடக்கிப் பிடிக்கப்பட்டனர்.

இவர்களிடமிருந்து 1.5 கிலோ ஹெராயின், 1 கிலோ அபின், 5 சட்டவிரோத கைத்துப்பாக்கிகள் மற்றும் 72 தோட்டாக்கள் பறிமுதல் செய்யப்பட்டுள்ளன. இதில் கைப்பற்றப்பட்ட கைத்துப்பாக்கிகளில் நான்கு பாகிஸ்தானிலும், ஒன்று சீனாவிலும் தயாரிக்கப்பட்டவை என்பதற்கான முத்திரைகள் இருந்தன. பறிமுதல் செய்யப்பட்ட ஹெராயின் சர்வதேச தரத்தில் இருந்ததாகவும், இவை எல்லை தாண்டி பாகிஸ்தானில் இருந்து இந்தியாவிற்குள் கடத்தி வரப்பட்டிருக்கலாம் என்றும் காவல்துறையினரின் முதற்கட்ட விசாரணையில் தெரியவந்துள்ளது.

இந்தச் சம்பவம் தொடர்பாகக் காவல் கண்காணிப்பாளர் ஹரிசங்கர் கூறுகையில், கைது செய்யப்பட்ட நபர்கள் நீண்டகாலமாக இத்தகைய கடத்தல் தொழிலில் ஈடுபட்டு வந்துள்ளனர் என்றார். இவர்கள் மீது போதைப்பொருள் தடுப்புச் சட்டம் (NDPS Act) மற்றும் ஆயுதச் சட்டத்தின் கீழ் வழக்குகள் பதிவு செய்யப்பட்டுள்ளன. இந்த சர்வதேச கடத்தல் வலையமைப்பில் தொடர்புடைய மற்ற நபர்களைக் கண்டறியவும், இதன் பின்னணியில் உள்ள முழுமையான சதித்திட்டத்தை வெளிப்படுத்தவும் காவல்துறையினர் தீவிர விசாரணை மேற்கொண்டு வருகின்றனர்.