இந்திய கம்யூனிஸ்ட் கட்சியின் மூத்த தலைவரும், தமிழக அரசியல் களத்தின் மிக முக்கியமான ஆளுமையுமான தோழர் ஆர். நல்லகண்ணு (வயது 101), உடல்நலக்குறைவு காரணமாக சென்னை ராஜீவ் காந்தி அரசு பொது மருத்துவமனையில் அனுமதிக்கப்பட்டுள்ளார். கடந்த சில நாட்களாக மூச்சுத்திணறல் மற்றும் வயது முதிர்வு சார்ந்த உபாதைகளால் பாதிக்கப்பட்டிருந்த அவருக்கு, நேற்று உடல்நிலையில் திடீர் பின்னடைவு ஏற்பட்டது. இதனையடுத்து, அவர் அதிதீவிர சிகிச்சைப் பிரிவில் (ICU) அனுமதிக்கப்பட்டு, மருத்துவ நிபுணர்கள் அடங்கிய குழுவினரால் 24 மணி நேரமும் தீவிரமாகக் கண்காணிக்கப்பட்டு வருகிறார்.
மருத்துவமனை நிர்வாகம் வெளியிட்டுள்ள அறிக்கையின்படி, அவருக்குத் தொற்று பாதிப்புடன் ரத்த அழுத்தம், சிறுநீரகக் கோளாறு மற்றும் உணவு உட்கொள்வதில் சிரமம் போன்ற உபாதைகள் இருப்பது உறுதி செய்யப்பட்டுள்ளது. தற்போது அவருக்குச் செயற்கை சுவாசக் கருவி (Ventilator) மூலம் சிகிச்சை அளிக்கப்பட்டு வருவதோடு, மருந்தின் அளவுகளும் அதிகரிக்கப்பட்டுள்ளன. தமிழக முதல்வர் மு.க. ஸ்டாலின் மற்றும் பல்வேறு அரசியல் கட்சித் தலைவர்கள் நேரில் சென்று அவரது உடல்நலம் குறித்து விசாரித்த நிலையில், அவரது உடல்நிலை சீராக மருத்துவக் குழுவினர் தொடர்ந்து தீவிர முயற்சி மேற்கொண்டு வருகின்றனர்.