பெங்களூருவின் கக்கடாசபுரா அடுத்த மல்லேஷ்பால்யா பகுதியில் உள்ள ஒரு காலி இடத்தில் சட்டவிரோதமாக அமைக்கப்பட்டிருந்த கொட்டகையில், புதன்கிழமை காலை சுமார் 10:30 மணியளவில் எரிவாயு சிலிண்டர்கள் வெடித்துச் சிதறின. இங்கு வணிக மற்றும் வீட்டு உபயோகத்திற்கான சுமார் 50 சிலிண்டர்கள் பதுக்கி வைக்கப்பட்டிருந்த நிலையில், அவற்றில் 3 மற்றும் 5 கிலோ எடை கொண்ட மூன்று சிறிய சிலிண்டர்கள் அடுத்தடுத்து வெடித்ததால் அப்பகுதியில் பெரும் பரபரப்பு உருவானது.
இந்த பயங்கர வெடிப்பின் காரணமாக ஏற்பட்ட அதிர்வினால், சம்பவ இடத்திற்கு அருகில் செயல்பட்டு வந்த ‘நேஷனல் சென்டர் ஃபார் எக்ஸலன்ஸ்’ பள்ளியின் ஜன்னல் கண்ணாடிகள் உடைந்தன. இதனால் வகுப்பில் இருந்த மாணவர்களும், அப்பகுதி மக்களும் கடும் அச்சத்திற்கு ஆளாகினர். இருப்பினும், பெரும் ஆபத்தை ஏற்படுத்தக்கூடிய பெரிய சிலிண்டர்கள் வெடிக்காததாலும், சம்பவம் நிகழ்ந்தபோது அந்த கொட்டகையின் அருகில் யாரும் இல்லாததாலும் நல்வாய்ப்பாக எவ்வித உயிர்ச்சேதமோ காயங்களோ ஏற்படவில்லை.
தகவல் அறிந்து உடனடியாக விரைந்து வந்த பயப்பனஹள்ளி காவல்துறையினரும், தீயணைப்பு மற்றும் மீட்புப் படையினரும் இணைந்து செயல்பட்டு தீயை முழுமையாகக் கட்டுக்குள் கொண்டுவந்தனர். இந்த இடத்தில் சட்டவிரோதமாக எரிவாயு நிரப்பும் பணிகள் நடந்திருக்கலாம் எனச் சந்தேகிக்கும் போலீசார், குறிப்பிட்ட நிலம் தொடர்பான பின்னணி மற்றும் அங்கு சிலிண்டர்களைப் பதுக்கி வைத்த நபர்கள் குறித்து தீவிர விசாரணை மேற்கொண்டு வருகின்றனர்.