பெங்களூருவில் நடுங்க வைக்கும் கொடூரம்… 40 அடியில் இருந்து விழுந்த ராட்சத பாறை… நொறுங்கிப்போன மனித உயிர்கள்…!

பெங்களூரு தெற்கு தாலுகாவுக்கு உட்பட்ட மடாபட்டணா பகுதியில் உள்ள கல் குவாரியில் வியாழக்கிழமை அதிகாலை நேரிட்ட பயங்கரப் பாறை சரிவு விபத்தில், பீகாரைச் சேர்ந்த புலம்பெயர் தொழிலாளர்கள் உட்பட 8 பேர் பரிதாபமாக உயிரிழந்தனர். பெங்களூரு நகர்ப்புற மற்றும் பெங்களூரு தெற்கு மாவட்ட எல்லையில் அமைந்துள்ள இந்த கல் அரவை நிலையத்தில் தொழிலாளர்கள் வழக்கம் போல் பணியில் ஈடுபட்டிருந்தபோது இந்த கொடூர விபத்து நிகழ்ந்துள்ளது. இடிபாடுகளில் சிக்கி சம்பவ இடத்திலேயே பலர் உயிரிழந்த நிலையில், மேலும் பலர் படுகாயமடைந்துள்ளனர்.

சுமார் 40 அடி உயரத்தில் இருந்து ராட்சத கிரானைட் பாறை ஒன்று திடீரென தொழிலாளர்கள் மீது சரிந்து விழுந்ததே இந்த விபத்துக்குக் காரணம் எனத் தெரியவந்துள்ளது. இந்த பாறை சரிவின் வீரியம் காரணமாக அங்கு நிறுத்தப்பட்டிருந்த கனரக வாகனங்கள் மற்றும் டிராக்டர் உள்ளிட்டவை சுக்குநூறாக நொறுங்கின. விபத்து குறித்து தகவல் அறிந்ததும் மீட்புப் படையினரும் காவல்துறையினரும் விரைந்து வந்து தேடுதல் மற்றும் மீட்புப் பணிகளைத் தொடங்கினர். காயமடைந்தவர்கள் உடனடியாக அருகில் உள்ள தனியார் மருத்துவமனையில் அனுமதிக்கப்பட்ட நிலையில், சிலரது நிலைமை கவலைக்கிடமாக இருப்பதால் பலி எண்ணிக்கை மேலும் உயரக்கூடும் என அஞ்சப்படுகிறது.

இந்த துயர சம்பவத்திற்கு கர்நாடக முதல்வர் டி.கே. சிவக்குமார் தனது ஆழ்ந்த இரங்கலைத் தெரிவித்துள்ளார். குவாரி தொழிலாளர்களின் உயிர் பாதுகாப்பு மற்றும் பாதுகாப்பு விதிமுறைகளை உறுதி செய்ய வேண்டியது குவாரி உரிமையாளர்களின் கடமை என்றும், விதிகளை மீறும் குவாரிகள் மீது அரசு கடுமையான சட்டப்பூர்வ நடவடிக்கை எடுக்கும் என்றும் அவர் உறுதியளித்துள்ளார். இதற்கிடையில், மருத்துவமனையில் சிகிச்சை பெற்று வந்த எட்டாவது தொழிலாளியும் சிகிச்சை பலனின்றி உயிரிழந்துவிட்டதாக யஷ்வந்த்பூர் தொகுதி சட்டமன்ற உறுப்பினர் எஸ்.டி. சோமசேகர் தெரிவித்துள்ளார்.

இவ்விபத்து குறித்து கடுமையான குற்றச்சாட்டுகளை முன்வைத்துள்ள சட்டமன்ற உறுப்பினர் சோமசேகர், இப்பகுதியில் பல ஆண்டுகளாக சட்டவிரோத குவாரி பணிகள் நடைபெற்று வருவதாகவும், இதுகுறித்து சட்டப்பேரவையில் தாம் பலமுறை குரல் எழுப்பியும் அதிகாரிகள் அலட்சியம் காட்டியதாகக் கூறினார். மேலும், குவாரி வெடிவிபத்துகளால் கடந்த காலங்களில் வனப்பகுதியில் சிறுத்தை ஒன்று உயிரிழந்ததைச் சுட்டிக்காட்டிய அவர், இந்த சட்டவிரோத செயல்களில் காவல்துறை, வனத்துறை மற்றும் சுரங்கத்துறை அதிகாரிகளுக்குத் தொடர்பு இருப்பதாகக் குற்றம் சாட்டினார். இதில் தொடர்புடைய பெரிய மனிதர்கள் சட்டத்தின் பிடியில் இருந்து தப்பிக்கக் கூடாது என அவர் வலியுறுத்தியுள்ள நிலையில், விபத்துக்கான காரணம் மற்றும் பாதுகாப்பு விதிமீறல்கள் குறித்து காவல்துறையினர் தீவிர விசாரணை மேற்கொண்டு வருகின்றனர்.