“டிரம்பின் ஒற்றைப் பதிவு”…. உலக நாடுகளுக்கு விடப்பட்ட பகிரங்க எச்சரிக்கை…. அடுத்த 24 மணி நேரத்தில் காத்திருக்கும் செக்….!

ஈரான் மற்றும் அமெரிக்கா இடையிலான அமைதிப் பேச்சுவார்த்தை தோல்வியடைந்ததைத் தொடர்ந்து, உலகமே உற்றுநோக்கும் ஹார்முஸ் நீரிணையை (Strait of Hormuz) முழுமையாக முடக்க டொனால்ட் டிரம்ப் உத்தரவிட்டிருப்பது சர்வதேச அரங்கில் பெரும் கொந்தளிப்பை ஏற்படுத்தியுள்ளது. இஸ்லாமாபாத்தில் நடைபெற்ற பேச்சுவார்த்தை ஈரானின் பிடிவாதத்தால் முறிந்ததாகக் கூறிய டிரம்ப், தனது ‘ட்ரூத் சோஷியல்’ பக்கத்தில் இந்த அதிரடி அறிவிப்பை வெளியிட்டுள்ளார். அதன்படி, அந்த நீரிணை வழியாகச் செல்லும் மற்றும் வெளியேறும் அனைத்துக் கப்பல்களையும் அமெரிக்கக் கடற்படை தடுத்து நிறுத்த வேண்டும் என அவர் ஆணையிட்டுள்ளார்.

இந்த மோதலுக்கு முக்கியக் காரணமாக அமைந்தது ஈரான் விதித்த ‘சுங்கக் கட்டணம்’ ஆகும். இந்தப் பாதையைப் பயன்படுத்தும் கப்பல்கள் தங்களுக்குக் கட்டணம் செலுத்த வேண்டும் என ஈரான் வலியுறுத்தியதை டிரம்ப் வன்மையாக மறுத்துள்ளார். குறிப்பாக, ஈரானுக்கு மறைமுகமாகக் கட்டணம் செலுத்திப் பயணிக்கும் கப்பல்களைக் குறிவைத்து மறிக்க வேண்டும் என்று அவர் கூறியிருப்பது, சர்வதேச வர்த்தகப் போக்குவரத்தில் பெரும் அச்சுறுத்தலை உருவாக்கியுள்ளது. இரு நாடுகளும் ஒருவரை ஒருவர் முந்திக்கொண்டு இந்த நீர்ச்சந்தியை மூடுவதற்கு முயற்சிப்பது உலகப் பொருளாதாரத்தையே ஆட்டம் காணச் செய்துள்ளது.

புவிசார் அரசியல் ரீதியாக ஹார்முஸ் நீரிணை மிகவும் முக்கியமானது. ஏனெனில், உலகளாவிய கச்சா எண்ணெய் போக்குவரத்தில் சுமார் 20 சதவீதம் இந்தப் குறுகிய பாதை வழியாகவே நடைபெறுகிறது. தற்போது நிலவும் போர் பதற்றத்தால், சர்வதேசச் சந்தையில் கச்சா எண்ணெய் விலை பீப்பாய் ஒன்றுக்கு 115 டாலரைத் தாண்டும் என்று நிபுணர்கள் எச்சரிக்கின்றனர். இது எரிபொருள் விலையை மட்டுமல்லாது, ஒட்டுமொத்தப் பொருட்களின் விலையேற்றத்திற்கும் வழிவகுக்கும் என்பதால் உலக நாடுகள் கவலையில் ஆழ்ந்துள்ளன.

இந்த நெருக்கடி இந்தியாவிற்கு மிகப்பெரிய சவாலாக உருவெடுத்துள்ளது. ஏற்கனவே எல்பிஜி இறக்குமதியில் சிக்கல்களைச் சந்தித்து வரும் இந்தியா, பெட்ரோல் மற்றும் டீசல் விலை உயர்வால் கடும் பொருளாதார நெருக்கடியைச் சந்திக்க நேரிடும். தனியார் எண்ணெய் நிறுவனங்கள் ஏற்கனவே விலையை உயர்த்தத் தொடங்கியுள்ள நிலையில், கச்சா எண்ணெய் விலை உயர்ந்தால் பொதுத்துறை நிறுவனங்களும் விலையை உயர்த்த வேண்டிய கட்டாயத்திற்குத் தள்ளப்படும். இது இந்தியாவில் பணவீக்கத்தை அதிகரித்து, சாமானிய மக்களின் வாழ்வாதாரத்தை நேரடியாகப் பாதிக்கும் ஒரு சங்கிலித் தொடர் விளைவை ஏற்படுத்தும் என அஞ்சப்படுகிறது.