ஹிமாச்சல பிரதேசத்தின் சம்பா மாவட்டத்தில் உள்ள திஸ்ஸா-பைராகர் பிரதான சாலையில் சனிக்கிழமை காலை பயங்கர பேருந்து விபத்து ஏற்பட்டது. பைராகரில் இருந்து சம்பா நோக்கி 18 பயணிகளுடன் சென்று கொண்டிருந்த ஒரு தனியார் பேருந்து, சாலுஜ் மோட் பகுதியில் திடீரென ஓட்டுநரின் கட்டுப்பாட்டை இழந்து கவிழ்ந்தது. இந்த விபத்தில் ஓட்டுநர் மற்றும் நடத்துநர் உட்பட 7 பேர் சம்பவ இடத்திலேயே பரிதாபமாக உயிரிழந்தனர். மேலும், பேருந்தில் பயணம் செய்த 11 பேர் பலத்த காயமடைந்தனர்.
தகவலறிந்து வந்த காவல்துறையினரும், அப்பகுதி மக்களும் இணைந்து உடனடி மீட்புப் பணியில் ஈடுபட்டனர். இடிபாடுகளுக்குள் சிக்கியவர்களை மீட்பதற்காக எக்ஸ்கவேட்டர் போன்ற கனரக இயந்திரங்கள் பயன்படுத்தப்பட்டன. காயமடைந்த 11 பேரும் மீட்கப்பட்டு அருகில் உள்ள மருத்துவமனைகளுக்கு சிகிச்சைக்காக அனுப்பி வைக்கப்பட்டனர். இந்த மலைப்பாதையில் பேருந்து கட்டுப்பாட்டை இழந்ததற்கான காரணம் குறித்து தீவிர விசாரணை நடைபெற்று வருகிறது.