கர்நாடக மாநிலம் மங்களூரு பகுதியில் அமைந்துள்ள தேசிய நெடுஞ்சாலை 73-ல், படீல் பகுதியிலிருந்து நந்தூர் நோக்கி சுற்றுலா கார் ஒன்று அதீத வேகத்தில் வந்து கொண்டிருந்தது. மரோளி சூரியா வுட்ஸ் வளைவு அருகே கார் வந்தபோது, சாலையில் இருந்த பயங்கரப் பள்ளத்தைத் தவிர்க்க முயன்றதாகக் கூறப்படுகிறது.
அப்போது ஓட்டுநரின் கட்டுப்பாட்டை இழந்த அந்த சொகுசு கார், பயங்கர வேகத்தில் சாலையோரம் இருந்த உயர்மின்னழுத்த மின் கம்பத்தின் மீது கொடூரமாக மோதி விபத்துக்குள்ளானது. மோதிய வேகத்தின் கொடூரத்தில் அந்தக் மின் கம்பம் உடைந்து, காரின் நடுப்பகுதியையே ஊடுருவிச் சென்று வாகனத்தைச் சின்னாபின்னமாக்கியது.
இந்த பயங்கர விபத்தில் காரின் முன் பகுதியில் இருந்த ஓட்டுநர் மற்றும் பயணி இருவரும் படுகாயமடைந்து காரின் இடிபாடுகளுக்குள் சிக்கி உயிருக்குப் போராடினர். மின் கம்பம் முறிந்து விழுந்தபோதிலும், நல்வாய்ப்பாக இருவருக்கும் உயிர்ச்சேதம் ஏதும் ஏற்படாமல் காயங்களுடன் தப்பியுள்ளனர். இக்கொடூர விபத்தின் பகீர் காட்சிகள் அங்குள்ள சிசிடிவி கேமராவில் பதிவாகி இணையத்தில் வைரலாகி வரும் நிலையில், போலிஸார் வழக்குப் பதிவு செய்து தீவிர விசாரணை மேற்கொண்டு வருகின்றனர்.