நாகப்பட்டினம் மாவட்டம் அந்தணப்பேட்டையைச் சேர்ந்த அசோக் – வாசுகி தம்பதியரின் மகள் மஹதி. தனியார் பள்ளியில் பன்னிரண்டாம் வகுப்பு பயின்று வந்த இவர், தனது தோழியின் உறவினர் எதிர்கொண்ட நிதி நெருக்கடிக்கு உதவுவதற்காக, வீட்டில் இருந்த மூன்று பவுன் நகையை யாருக்கும் தெரியாமல் ரகசியமாக எடுத்துக் கொடுத்துள்ளார். இந்த விவகாரத்தைக் கண்டறிந்த மாணவியின் பெற்றோர், மகளிர் காவல் நிலையத்தில் புகார் அளித்து காவல்துறையினரின் உதவியோடு தோழியிடமிருந்து அந்த நகையைத் திரும்பப் பெற்றனர்.
நகை கொடுத்த விவகாரம் தொடர்பாக பெற்றோர்களுக்கும் மாணவி மஹதிக்கும் இடையே கடும் வாக்குவாதம் ஏற்பட்டுள்ளது. பெற்றோரின் கண்டிப்பால் மிகுந்த மன உளைச்சலுக்கு ஆளான அந்தச் சிறுமி, தனது வீட்டின் அறையில் தூக்கிட்டுத் தற்கொலை செய்து கொண்டார். தகவல் அறிந்து நிகழ்விடத்திற்கு வந்த நாகை நகர காவல்துறையினர், உடலை பிரேத பரிசோதனைக்காக அரசு மருத்துவமனைக்கு அனுப்பி வைத்து, இச்சம்பவம் குறித்து தீவிர விசாரணை மேற்கொண்டு வருகின்றனர். உற்ற தோழிக்கு உதவ நினைத்து இறுதியில் தன் உயிரை விட்ட மாணவியின் இந்த முடிவு அப்பகுதியில் பெருஞ்சோகத்தை ஏற்படுத்தியுள்ளது.