உத்தரப் பிரதேச மாநிலம் ஹர்தோய் பகுதியில் உள்ள சன்பீம் பள்ளியில், கூடுதல் நோட்டுப் புத்தகங்களை வாங்குமாறு பெற்றோரை நிர்வாகம் வற்புறுத்திய சம்பவம் சமூக வலைதளங்களில் பெரும் விவாதத்தை ஏற்படுத்தியுள்ளது. இந்தப் பள்ளியில் யுகேஜி பயிலும் அலிஷா என்ற மாணவியின் தாய் நீலம் வர்மா, ஏற்கனவே தேவையான பாடப் புத்தகங்களை வாங்கிவிட்டதாகக் கூறி, கூடுதல் புத்தகங்கள் வாங்க கால அவகாசம் கேட்டுள்ளார். ஆனால், பள்ளி முதல்வர் மம்தா மிஸ்ரா மற்றவர்கள் முன்னிலையில் நீலம் வர்மாவிடம் கோபமாக வாக்குவாதம் செய்து கத்திய வீடியோ இணையத்தில் வைரலாகி கடும் கண்டனங்களைப் பெற்று வருகிறது.
இந்தச் சம்பவம் குறித்து விளக்கிய நீலம் வர்மா, பள்ளி நிர்வாகம் ரூ.1,200 மதிப்புள்ள கூடுதல் நோட்டுப் புத்தகங்களை உடனடியாக வாங்குமாறு வற்புறுத்தியதாகத் தெரிவித்துள்ளார். தன்னிடம் ஏற்கனவே புத்தகங்கள் இருந்தும், பள்ளியில் இருந்துதான் வாங்க வேண்டும் என அழுத்தம் கொடுக்கப்பட்டுள்ளது. மேலும், கூடுதல் நோட்டுப் புத்தகங்கள் இல்லாத காரணத்தால் சிறுமி அலிஷா வீட்டுப்பாடம் செய்ய முடியாமல் போன நிலையில், இது குறித்துப் பேசச் சென்ற பெற்றோரை பள்ளித் தலைமை ஆசிரியை மற்றும் நிர்வாகத்தினர் தரக்குறைவாக நடத்தியது அதிர்ச்சியை ஏற்படுத்தியுள்ளது.
தனியார் பள்ளிகள் தங்களுக்குத் தேவையான வருமானத்தைப் பெருக்கிக்கொள்ள இதுபோன்ற கட்டாய விற்பனையில் ஈடுபடுவதாகப் பொதுமக்கள் குற்றம் சாட்டுகின்றனர். அரசுப் பள்ளிகள் மீதான நம்பிக்கை குறைபாட்டைப் பயன்படுத்தி, தனியார் பள்ளிகள் பெற்றோர்களின் கட்டாயச் சூழலைச் சுரண்டுவதாக இணையவாசிகள் விவாதித்து வருகின்றனர். கல்வி நிறுவனங்கள் லாப நோக்கோடும், மிரட்டும் தொனியிலும் செயல்படுவது மாணவர்களின் எதிர்காலத்தைப் பாதிக்கும் என்பதால், கல்வித்துறை இதில் தலையிட வேண்டும் என்ற கோரிக்கையும் வலுத்து வருகிறது.
People avoid govt schools despite paying taxes and an education cess, because the system has failed to earn their trust. Private schools exploit this compulsion. With no real alternatives, parents are squeezed and intimidated.
Here, a principal from a reputed private school in… pic.twitter.com/tqfL9Zkapz
— THE SKIN DOCTOR (@theskindoctor13) April 26, 2026