அகமதாபாத்தில் குஜராத் காங்கிரஸ் தலைவரும், மாநிலங்களவை எம்பியுமான சக்திசிங் கோஹிலின் மருமகன் யஷ்ராஜ் கோஹில், தனது மனைவியைத் துப்பாக்கியால் சுட்டுவிட்டுத் தானும் தற்கொலை செய்து கொண்ட சம்பவம் பெரும் அதிர்ச்சியை ஏற்படுத்தியுள்ளது. குஜராத் கடல்சார் வாரியத்தில் (GMB) அதிகாரியாகப் பணிபுரிந்து வந்த யஷ்ராஜ், தனது மனைவி ராஜேஸ்வரி ஜடேஜாவை உரிமம் பெற்ற துப்பாக்கியால் சுட்டதாகக் கூறப்படுகிறது .
புதன்கிழமை இரவு இந்தத் துயரச் சம்பவம் நிகழ்ந்துள்ளது. தம்பதியினர் இரவு உணவை முடித்துவிட்டு வீட்டிற்குத் திரும்பிய பிறகு, யஷ்ராஜின் துப்பாக்கியிலிருந்து எதிர்பாராமல் வெடித்த குண்டு ராஜேஸ்வரியின் கழுத்துப் பகுதியில் பாய்ந்ததாக ஒரு தரப்புக் கூற்றுகள் தெரிவிக்கின்றன. உடனடியாக 108 ஆம்புலன்ஸ் சேவைக்கு யஷ்ராஜ் போன் செய்துள்ளார். ஆனால், சம்பவ இடத்திற்கு வந்த மருத்துவக் குழுவினர் ராஜேஸ்வரி ஏற்கனவே உயிரிழந்துவிட்டதை உறுதி செய்தனர். மனைவியின் மரணச் செய்தியால் கடும் அதிர்ச்சியடைந்த யஷ்ராஜ், அதே துப்பாக்கியால் தன்னைத்தானே சுட்டுக் கொண்டு தற்கொலை செய்துகொண்டார்.
பவநகரைச் சேர்ந்த இவர்களுக்குத் திருமணமாகி இரண்டு மாதங்களே ஆன நிலையில், இது இருவருக்குமே இரண்டாவது திருமணமாகும். இச்சம்பவம் குறித்து வஸ்த்ராபூர் காவல்துறையினர் வழக்குப் பதிவு செய்து, இது திட்டமிட்ட கொலையா அல்லது தற்செயலாக நடந்த விபத்தா என்ற கோணத்தில் தீவிர விசாரணை நடத்தி வருகின்றனர்.