“11 பேருக்கும் சீட் இல்லை”… டெல்லிக்கு பறந்த ரகசிய ஃபைல்.. காங்கிரஸுக்கு எதிராக திரும்பிய அறிவாலயம்.. 2026 தேர்தலில் காத்திருக்கும் பெரிய ட்விஸ்ட்….!

தமிழக அரசியலில் தற்போது அறிவாலயத்தின் “ரகசிய ரிப்போர்ட்” குறித்த விவகாரம் காங்கிரஸ் வட்டாரத்தில் பெரும் அதிர்வலைகளை ஏற்படுத்தியுள்ளது. திமுக தலைமை, காங்கிரஸ் கட்சியின் 11 சட்டமன்ற உறுப்பினர்களின் செயல்பாடுகள் குறித்து டெல்லி மேலிடத்திற்கு ஒரு ரகசிய அறிக்கையை அனுப்பியுள்ளதாகத் தகவல்கள் கசிந்துள்ளன. அந்த அறிக்கையில், குறிப்பிட்ட 11 எம்.எல்.ஏ-க்களின் தொகுதிப் பணிகள் திருப்திகரமாக இல்லை என்றும், மக்கள் மத்தியில் அவர்களுக்குச் செல்வாக்கு குறைந்துள்ளதாகவும் சுட்டிக்காட்டப்பட்டுள்ளது. இதனால், வரும் தேர்தலில் அதே தொகுதிகளில் அவர்கள் மீண்டும் போட்டியிட்டால் வெற்றி பெறுவது கடினம் என திமுக தரப்பு கறாராகத் தெரிவித்துள்ளதாகக் கூறப்படுகிறது.

இந்த அதிரடி நடவடிக்கையால் பாதிக்கப்பட்ட காங்கிரஸ் எம்.எல்.ஏ-க்கள் மிகுந்த கவலையிலும் அதிர்ச்சியிலும் ஆழ்ந்துள்ளனர். “திமுகவுடனான கூட்டணி தொடர வேண்டும் என்பதில் நாங்கள் உறுதியாக இருந்தோம், ஆனால் எங்களுக்கே அறிவாலயம் செக் வைத்துவிட்டதே” என அவர்கள் தங்களுக்குள் புலம்பி வருவதாக அரசியல் வட்டாரங்கள் தெரிவிக்கின்றன. ஒருவேளை அவர்களுக்கு மீண்டும் வாய்ப்பு வழங்கப்பட்டால், தற்போதுள்ள தொகுதிகளை மாற்றிவிட்டு வேறு தொகுதிகளில் போட்டியிடுமாறு அறிவுறுத்தப்பட்டுள்ளதாகவும் தெரிகிறது. தொகுதிப் பங்கீட்டிற்கு முன்னரே திமுக எடுத்துள்ள இந்த வியூகம், காங்கிரஸ் கட்சிக்குள் பெரும் சலசலப்பை உருவாக்கியுள்ளது.