“முதல்ல உங்க வீட்ல கேளு, உன் பொண்டாட்டியே உனக்கு ஓட்டுப் போடமாட்டாங்க”… விஜய்யை மேடையிலேயே கிழித்து தொங்கவிட்ட திருச்சி சூர்யா…!

தமிழக வெற்றி கழகத்தின் மூன்றாம் ஆண்டு தொடக்க விழாவில் பேசிய நடிகர் விஜய், தமிழக முதல்வர் ஸ்டாலினைச் சவாலுக்கு இழுக்கும் வகையில் பேசியது பெரும் விவாதத்தைக் கிளப்பியது. “தூக்கத்தில் இருக்கும் முதல்வரை எழுப்பி யாரிடம் ஓட்டுப் போடுவீர்கள் எனக் கேட்டால் கூட, அவர் தவெகவின் விசில் சின்னத்திற்குத் தான் ஓட்டுப் போடுவேன் எனக் கூறுவார்” என்று விஜய் விமர்சித்திருந்தார். விஜய்யின் இந்த அதிரடிப் பேச்சுக்கு பதிலடி கொடுக்கும் வகையில், திருச்சி சூர்யா ஒரு தனியார் ஊடகத்திற்கு அளித்த பேட்டியில் மிகக் கடுமையான விமர்சனங்களை முன்வைத்துள்ளார்.

முதல்வர் ஸ்டாலின் பற்றி விஜய் பேசியதற்குப் பதிலளித்த திருச்சி சூர்யா, “முதலமைச்சரை விடுங்கள், உங்கள் வீட்டிலேயே உங்களுக்கு ஓட்டுப் போடுவார்களா?” என்று நேரடியாகச் சாடினார். விஜய்யின் மனைவி சங்கீதா மற்றும் அவரது மகன் சஞ்சய் ஆகியோர் வெளிநாட்டு குடியுரிமை பெற்றவர்கள் என்று குறிப்பிட்ட அவர், “உன் மனைவி சங்கீதா லண்டன் சிட்டிசன் என்றும், மகன் கனடா சிட்டிசன் என்றும் சொல்கிறார்கள். அப்படி இருக்கும்போது, உன் மனைவியே உனக்கு ஓட்டுப் போட முடியாது. உங்கள் குடும்பத்திலேயே உங்களுக்கு ஆதரவு இல்லாதபோது மற்றவர்களைப் பேசுவது வேடிக்கையாக இருக்கிறது” என்று விமர்சித்துள்ளார்.

மேலும், விஜய்யின் அரசியல் செயல்பாடுகள் குறித்தும் திருச்சி சூர்யா பல கேள்விகளை எழுப்பினார். திமுக எதிர்ப்பை மட்டுமே தகுதியாகக் கொண்டு விஜய் அரசியல் செய்கிறாரா என்றும், மக்கள் பிரச்சினைகளுக்காக அவர் எப்போது களமிறங்கினார் என்றும் கேள்வி எழுப்பினார். கடந்த இரண்டு ஆண்டுகளில் பரந்தூர் விமான நிலையம் மற்றும் லாக் அப் மரணம் போன்ற ஒரு சில சம்பவங்களுக்குத் தவிர, விஜய் மற்ற மக்கள் பிரச்சினைகளுக்கு வெளியே வரவில்லை என்றும், வெறும் மேடைப் பேச்சால் மட்டும் வெற்றியை ஈட்டிவிட முடியாது என்றும் அவர் சுட்டிக்காட்டினார்.

அதிமுகவை ஊழல் கட்சி என்று மறைமுகமாகச் சாடும் விஜய், துணிச்சல் இருந்தால் ஜெயலலிதாவின் பெயரைச் சொல்லிக் குற்றம் சாட்ட வேண்டும் என்று சூர்யா சவால் விடுத்தார். அண்ணா, எம்.ஜி.ஆர் போன்ற தலைவர்கள் எடுத்த எடுப்பிலேயே முதலமைச்சர் ஆகவில்லை என்பதை விஜய் புரிந்துகொள்ள வேண்டும் என்றும், கட்சிக்குள் இருக்கும் உட்கட்சிப் பூசல்களைச் சரி செய்யாமல் மற்றவர்களை விமர்சிப்பதில் பயன் ஏதுமில்லை என்றும் திருச்சி சூர்யா அந்தப் பேட்டியில் மிக ஆவேசமாகத் தெரிவித்துள்ளார்.