நிஜமாகும் கொரோனா பயம்… நடுக்கடலில் சிக்கிய 150 பயணிகள்: அலறும் சொகுசு கப்பல்…. அதிரவைக்கும் பின்னணி…!

கடந்த சில ஆண்டுகளுக்கு முன்பு உலகையே உலுக்கிய கொரோனா பாதிப்புகளைப் போலவே, தற்போது ‘ஹோண்டியஸ்’ (Hondius) எனும் சொகுசு கப்பலில் ஏற்பட்டுள்ள ஹான்டா வைரஸ் (Hantavirus) பரவல் சர்வதேச அளவில் பெரும் அதிர்ச்சியை ஏற்படுத்தியுள்ளது. அர்ஜென்டினாவிலிருந்து அட்லாண்டிக் கடலில் சுற்றுலா சென்ற இந்தக் கப்பலில், வைரஸ் பாதிப்பால் ஒரு டச்சு தம்பதி மற்றும் ஜெர்மனி நாட்டைச் சேர்ந்தவர் என மொத்தம் மூன்று பேர் உயிரிழந்துள்ளனர். மேலும் பலருக்கு அறிகுறிகள் தென்பட்டுள்ள நிலையில், ஒரு பிரிட்டிஷ் பயணி ஆபத்தான நிலையில் மீட்கப்பட்டு தென்னாப்பிரிக்காவில் தீவிர சிகிச்சை பெற்று வருகிறார். இந்தச் சம்பவம் சுற்றுலா பயணிகளிடையே பெரும் பீதியைக் கிளப்பியுள்ளது.

தற்போது ஆப்பிரிக்காவின் கேப் வெர்டே தீவு அருகே நடுக்கடலில் நிறுத்தப்பட்டுள்ள இந்தக் கப்பலில், அமெரிக்கா, பிரிட்டன் மற்றும் ஸ்பெயின் உள்ளிட்ட நாடுகளைச் சேர்ந்த சுமார் 150 பயணிகள் வெளியேற முடியாமல் சிக்கியுள்ளனர். முன்னெச்சரிக்கை நடவடிக்கையாகக் கப்பலைத் தனது துறைமுகத்தில் அனுமதிக்க கேப் வெர்டே மறுத்துவிட்டதால், இது ஒரு மிதக்கும் சிறையைப் போல மாறியுள்ளது. 14,000 யூரோக்களுக்கு மேல் செலவு செய்து மகிழ்ச்சியான பயணத்தை மேற்கொண்டவர்களுக்கு, இந்தச் சூழல் ஒரு தீராத போராட்டமாக மாறியுள்ளது. தற்போது பயணிகளைப் பாதுகாப்பாக வெளியேற்ற ஸ்பெயினின் லாஸ் பால்மாஸ் பகுதிக்குக் கப்பலை கொண்டு செல்ல நிர்வாகம் திட்டமிட்டு வருகிறது.

இந்த ஹான்டா வைரஸ் பொதுவாகப் பாதிக்கப்பட்ட எலிகளின் எச்சங்கள், சிறுநீர் அல்லது உமிழ்நீர் ஆகியவற்றின் மூலமே பரவுகிறது. நவீன வசதிகள் கொண்ட ஒரு சொகுசு கப்பலுக்குள் இத்தகைய வைரஸ் நுழைந்தது எப்படி என்பது சர்வதேச சுற்றுலா துறையில் விவாதப் பொருளாகியுள்ளது. கப்பல் நிர்வாகத்தின் தூய்மை மற்றும் பாதுகாப்பு நடைமுறைகளில் உள்ள குறைபாடுகளையே இது சுட்டிக்காட்டுகிறது. 2020-ம் ஆண்டு ஜப்பானின் ‘டைமண்ட் பிரின்சஸ்’ கப்பலில் கொரோனா பரவியபோது ஏற்பட்ட அதே பதற்றமான சூழலை இந்தச் சம்பவம் உலகிற்கு மீண்டும் நினைவுபடுத்தியுள்ளது.

இருப்பினும், கொரோனா வைரஸுடன் ஒப்பிடுகையில் ஹான்டா வைரஸ் மனிதர்களிடமிருந்து மனிதர்களுக்குப் பரவுவது மிகவும் அரிதான ஒன்று என உலக சுகாதார நிறுவனம் (WHO) விளக்கம் அளித்துள்ளது. பாதிக்கப்பட்ட எலிகளுடன் நேரடித் தொடர்பு கொண்டால் மட்டுமே பாதிப்பு ஏற்படும் என்பதால், பொதுமக்களுக்கு இதனால் ஏற்படும் அச்சுறுத்தல் மிகக் குறைவு என்று தெளிவுபடுத்தப்பட்டுள்ளது. இந்தத் தகவல் சற்று ஆறுதல் அளித்தாலும், சர்வதேச பயணங்களின் போது சுகாதார முன்னெச்சரிக்கை நடவடிக்கைகள் எவ்வளவு முக்கியம் என்பதை இச்சம்பவம் மீண்டும் ஒருமுறை உரக்கச் சொல்லியுள்ளது.