ஹரியானா மாநிலம் ஹான்சி பகுதியில் 25 வயதான உடற்பயிற்சிக் கூட உரிமையாளர் கபில் என்பவர், அடையாளம் தெரியாத மர்ம நபர்களால் சுட்டுக் கொலை செய்யப்பட்டுள்ள அதிர்ச்சி சம்பவம் அரங்கேறியுள்ளது. வியாழக்கிழமை அதிகாலை 5:30 மணியளவில் பவ்வாரா சவுக் அருகே உள்ள தனது உடற்பயிற்சிக் கூடத்திற்கு வெளியே, ஒரு பெண் உட்பட 5 முதல் 6 மாணவர்களுக்கு அவர் ‘ஸ்டெப்-அப்’ உடற்பயிற்சி சொல்லிக் கொடுத்துக் கொண்டிருந்தபோது இந்த கொடூரம் நிகழ்ந்துள்ளது. அப்போது இருசக்கர வாகனத்தில் வந்த இருவரில், தொப்பி அணிந்திருந்த ஒரு நபர் வெறும் 5 வினாடிகளில் சுமார் 10 முறை துப்பாக்கியால் சரமாரியாக சுட்டதில், கபில் சம்பவ இடத்திலேயே உயிரிழந்தார்.
இதயத்தை உலுக்கும் இந்த ஒட்டுமொத்த சம்பவமும் அங்குள்ள சிசிடிவி கேமராவில் பதிவாகி தற்போது சமூக வலைதளங்களில் வெளியாகியுள்ளது. திடீரென துப்பாக்கிச் சூடு சத்தம் கேட்டதும் அங்கிருந்த மாணவர்கள் பயத்தில் அலறியடித்துக் கொண்டு ஓடும் காட்சிகள் அதில் பதிவாகியுள்ளன. ஜிந்த் பகுதியைச் சேர்ந்த கபில் அண்மையில்தான் திருமணமானவர் என்பதும், தனது தொழிலை விரிவுபடுத்துவதற்காக ஹான்சி பகுதிக்கு வந்துள்ளார் என்பதும் குறிப்பிடத்தக்கது. இந்தத் கொடூரத் தாக்குதலுக்கான காரணம் என்ன என்பது குறித்து வழக்குப் பதிவு செய்துள்ள போலீஸார், தப்பியோடிய குற்றவாளிகளைத் தீவிரமாகத் தேடி வருகின்றனர்.