“சீறிப்பாய்ந்த ராக்கெட்…” ஜிபிஎஸ் சேட்டிலைட் NVS-03 விண்ணில் வெற்றிகரமாக நிலைநிறுத்தம்… இஸ்ரோவின் பிரம்மாண்ட சாதனை…!!

இந்திய விண்வெளி ஆய்வு நிறுவனம், தனது உள்நாட்டு வழிகாட்டல் அமைப்பான ‘நேவிக்’ சேவையை மேலும் வலுப்படுத்தும் நோக்கில், NVS-03 ஜிபிஎஸ் செயற்கைக்கோளை ஜி.எஸ்.எல்.வி – எஃப்18 ராக்கெட் மூலம் வெற்றிகரமாக விண்ணில் நிலைநிறுத்திப் வரலாற்றுச் சாதனை படைத்துள்ளது.

ஸ்ரீஹரிகோட்டாவில் உள்ள சதீஷ் தவான் விண்வெளி ஆய்வு மையத்திலிருந்து நள்ளிரவு 11:51 மணிக்கு ஏவப்பட்ட ‘ஸ்மார்ட் பாய்’ என அழைக்கப்படும் ஜி.எஸ்.எல்.வி எஃப்-18 ராக்கெட், NVS-03 செயற்கைக்கோளைப் புவிநிகர் சுற்றுப்பாதையில் துல்லியமாக நிலைநிறுத்தியது. இந்த செயற்கைக்கோளில் விண்வெளி பயன்பாட்டு மையத்தால் உள்நாட்டிலேயே பிரத்யேகமாக உருவாக்கப்பட்ட அதிநவீன ரூபிடியம் அணு கடிகாரம் பொருத்தப்பட்டுள்ளது. இது எல்1, எல்5 மற்றும் எஸ் அலைவரிசைகளில் துல்லியமான சிக்னல்களை அனுப்பும் என்பதால், நவீன ஸ்மார்ட்போன்கள் மற்றும் கையில் அணியும் ஸ்மார்ட் சாதனங்களில் இதன் வழிகாட்டல் சேவைகளைப் பயன்படுத்த முடியும்.

வங்கிகள், பங்குச் சந்தைகள், பாதுகாப்புப் படைகள் மற்றும் பேரிடர் மேலாண்மைக் காலங்களில் துல்லியமான நேரம் மற்றும் இருப்பிடத்தைக் கண்டறிய இந்த அணு கடிகாரம் மிகவும் முக்கியமானது. அமெரிக்காவின் ஜிபிஎஸ் அமைப்பைச் சார்ந்திருப்பதைக் குறைத்து, நாட்டின் தொழில்நுட்பத் தன்னிறைவை வலுப்படுத்தும் வகையில் 2024 முதல் 2029 வரை 50 செயற்கைக்கோள்களை ஏவத் திட்டமிட்டுள்ள இஸ்ரோவின் இந்த நடவடிக்கை, இந்திய விண்வெளித் துறையில் ஒரு முக்கிய மைல்கல்லாகப் பார்க்கப்படுகிறது.