1960-களிலேயே சில படங்களில் துணைக் கதாபாத்திரங்களில், முகம் தெரியாத கதாபாத்திரங்களில் நடித்து வந்த கவுண்டமணிக்கு பாரதிராஜா இயக்கிய 16 வயதினிலே திரைப்படம்தான் திருப்புமுனையாக அமைந்தது. அந்த படத்தில் ரஜினிகாந்த் உடன் இருந்து அவரை டிரிகர் செய்யும் கதாபாத்திரத்தில் கவுண்டமணி கலக்கியிருப்பார். படத்தில் அவர் சொல்லும் ‘பத்த வச்சிட்டியே பரட்ட்’ வசனம் இன்று வரை பிரபலமாக இருந்து வருகிறது.
16 வயதினிலே திரைப்படம் பெரிய ஹிட்டானதும் அடுத்தடுத்து அவருக்கு உடனேயே பெரிய வாய்ப்புகள் உருவாகிவிடவில்லை. கிடைத்த கதாபாத்திரங்களில் தலைகாட்டி வந்தார். 80 களுக்கு பிறகே அவர் செந்திலோடு இணைந்து தங்களுக்கென ஒரு ஸ்டைல் காமெடியை உருவாக்கினார்.
கவுண்டமணியின் பாணியைதான் தற்போது சந்தானம் மற்றும் யோகி பாபு ஆகிய இருவருமே ஃபாலோ பண்ணி வருகின்றனர். இடையில் கவுண்டமணி சில ஆண்டுகள் அவரின் உடல் நலக்குறைவு காரணமாக சினிமாவில் இருந்து விலகியிருந்தார். ஒரு இடைவெளிக்குப் பிறகு இப்போது அவர் பழனிச்சாமி வாத்தியார் மற்றும் ஒத்த ஓட்டு முத்தையா ஆகிய படங்களில் கதாநாயகனாக நடித்து வருகிறார்.
கவுண்டமணியைப் பொறுத்தவரை அவர் தமிழ் சினிமாவின் மற்ற நடிகர்களை விட வித்தியாசமானவர். தொலைக்காட்சிகள் பத்திரிக்கைகளுக்கு எந்த நேர்காணலும் கொடுக்க மாட்டார். தானுண்டு தன் வேலையுண்டு என்று இருப்பவர். தனக்கு ரசிகர் மன்றம் ஆரம்பிக்க வேண்டும் என்று சொன்னவர்களிடம் கூட “தம்பி என் வேலை சினிமாவுல நடிக்குறது மட்டும்தானு” சொல்லி அனுப்பி விடுவாராம்.
அப்படிப்பட்ட கவுண்டமணிக்கு ஊர் செண்ட்டிமெண்ட் கூட இல்லாத ஆளாம். இது பற்றி சத்யராஜ் ஒரு நேர்காணலில் சொல்லும் போது “ஷூட்டிங்குக்கு தன் ஊரான பொள்ளாச்சி சென்றால் கூட ‘இந்த ஊரெல்லாம் வேண்டாம் என்றுதான் சென்னைக்கு ஓடிவந்தோம். ஆனா இப்ப கூட ஷூட்டிங் இங்க வைக்குறானுங்க” என ஜாலியாக கலாய்ப்பார் என சத்யராஜ் தெரிவித்துள்ளார்.