இப்போ நகை வாங்காதீங்க… பாதாளத்தில் விழும் தங்கம்.. “ரூ.10,000க்கு கூட போகலாம்”… இன்பதிர்ச்சி கொடுத்த ஆனந்த் சீனிவாசன்…!

கடந்த சில காலங்களாக வரலாறு காணாத உச்சத்தைத் தொட்டு வந்த தங்கத்தின் விலை, தற்போது மக்கள் எதிர்பார்த்தபடியே தொடர்ந்து சரிவைச் சந்தித்து வருகிறது. இந்த விலை வீழ்ச்சி எவ்வளவு காலம் நீடிக்கும் மற்றும் எந்த அளவுக்குக் குறையும் என்பதுதான் தற்போதைய பேசுபொருளாக உள்ளது. இது குறித்துப் பேசியுள்ள பொருளாதார வல்லுநர் ஆனந்த் சீனிவாசன், சர்வதேச அரசியல் சூழல்கள், குறிப்பாக அமெரிக்க அதிபர் டிரம்பின் முடிவுகள் மற்றும் ஈரான் உடனான போர் பதற்றங்கள் தங்கத்தின் விலையில் பெரும் தாக்கத்தை ஏற்படுத்தும் எனக் குறிப்பிட்டுள்ளார்.

அமெரிக்க அதிபர் டிரம்ப் ஒருபுறம் போரை நிறுத்த விரும்புவதாகக் கூறினாலும், ஈரான் அதனை மறுத்து வருவதால் மத்திய கிழக்கில் நிலவும் பதற்றம் இன்னும் தணிந்தபாடில்லை. உள்நாட்டு அழுத்தங்களைச் சமாளிக்க டிரம்ப் முயன்றாலும், ஹார்முஸ் ஜலசந்தியைத் தனது கட்டுப்பாட்டில் கொண்டு வருவது அமெரிக்காவிற்கு எளிதான காரியமாக இருக்காது. டிரம்ப் பங்குச்சந்தையைச் சமாதானப்படுத்த சில கருத்துகளைச் சொன்னாலும், கள நிலவரம் வேறாக இருப்பதாக ஆனந்த் சீனிவாசன் எச்சரிக்கிறார்.

டாலரின் மதிப்பு உயரும்போது பொதுவாகத் தங்கத்தின் விலை குறையும் என்பது உலகளாவிய விதியாகும். ஆனால், கச்சா எண்ணெய் விலை குறையாத பட்சத்தில், அது தங்கத்தின் விலையில் நெருக்கடியை ஏற்படுத்தும். குறுகிய காலத்தில் தங்கம் விலை ஒரு கிராம் ரூ. 12,500 என்ற அளவை உடைத்து, ரூ. 11,000 வரை செல்வதற்கான வாய்ப்புகள் பிரகாசமாக இருப்பதாக அவர் கணித்துள்ளார். ஒருவேளை போர்ச் சூழல் தீவிரமடைந்தால், தங்கம் விலை ரூ. 10,000 வரை கூடச் சரியக்கூடும் என்பது அவரது கணிப்பு.

அடுத்த ஆறு மாதங்களுக்குத் தங்கம் விலை சரிவைச் சந்திக்க வாய்ப்புள்ளதாகக் கூறும் அவர், போர் ஒருவேளை முடிவுக்கு வந்தாலும் அமெரிக்காவில் பணவீக்கம் ஏற்பட வாய்ப்புள்ளதைச் சுட்டிக்காட்டுகிறார். அமெரிக்கப் பெடரல் வங்கி வட்டி விகிதத்தைக் குறைத்தால் மட்டுமே தங்கம் விலை நிரந்தரமாகக் குறையும். அதே சமயம், சீனா போன்ற நாடுகள் டாலரை விற்றுத் தங்கத்தை வாங்கத் தொடங்கினால், இந்த விலை சரிவு எவ்வளவு காலம் நீடிக்கும் என்பதை யாராலும் துல்லியமாகச் சொல்ல முடியாது.

எனவே, முதலீட்டாளர்களும் பொதுமக்களும் தங்கம் விலை மிகக் குறைந்த விலைக்கு வரும் வரை காத்திருக்காமல், சரிவு ஏற்படும் போதெல்லாம் கொஞ்சம் கொஞ்சமாகத் தங்கத்தை வாங்குவதே புத்திசாலித்தனம் என்று அவர் ஆலோசனை வழங்கியுள்ளார். தங்கம் குறுகிய காலத்தில் சரிந்தாலும், நீண்ட கால அடிப்படையில் மீண்டும் விலை உயரவே செய்யும் என்பதால், முறையான திட்டமிடலுடன் முதலீடு செய்வது அவசியம்.